Գերմանիայի տնտեսությունը շարունակում է թուլանալ՝ չկարողանալով դուրս գալ ճգնաժամից

Գերմանիայի տնտեսությունը շարունակում է թուլանալ, իսկ 2025-ի երրորդ եռամսյակում լավագույն դեպքում ցույց է տվել ստագնացիա, նշում է Բունդեսբանկը՝ Bloomberg-ի հրապարակմամբ։ Բանկի մասնագետները շեշտում են, որ գերմանական արդյունաբերությունը տառապում է կառուցվածքային խնդիրներից և ամերիկյան մաքսերից, ինչի հետևանքով նվազել է արտադրական հզորությունների օգտագործումը և ներդրումային ակտիվությունը։

Բացի այդ, շինարարական հատվածի վերականգնումը դեռ հեռու է, իսկ մասնավոր սպառումը, եթե նույնիսկ աճել է, ապա նշանակալի չէ։ Երկրի տնտեսությունը փորձում է դուրս գալ արդեն երկամյա արտադրական անկումից, սակայն դրական միտումներ առայժմ չեն նկատվում։

Չնայած ընդհանուր թուլացմանը, Բունդեսբանկի նախագահ Յոախիմ Նագելը հայտարարել է, որ մինչև տարվա ավարտը Գերմանիան դեռ կարող է ցուցադրել չնչին տնտեսական աճ։ Ավելի վաղ հայտնի էր դարձել, որ 2025-ի օգոստոսին Գերմանիայի արտահանումը դեպի ԱՄՆ նվազել է 2,5 տոկոսով, ինչը մտահոգիչ է՝ հաշվի առնելով, որ ամերիկյան շուկան համարվում է գերմանական արտադրողների հիմնական սպառման ուղղություններից մեկը։