Ինձ համար շատ մտահոգիչ են պլաստիկ վիրաբուժության ոլորտում վերջերս հաճախակիացած անհաջող ելքերով դեպքերը. Անահիտ Ավանեսյան

«Ինձ համար շատ մտահոգիչ են պլաստիկ վիրաբուժության ոլորտում վերջերս հաճախակիացած անհաջող ելքերով դեպքերը»,- հանդիպելով պլաստիկ վիրաբուժական կենտրոնների ներկայացուցիչների, պլաստիկ վիրաբուժության ամբիոնների ներկայացուցիչների և «Հայաստանի պլաստիկ վիրաբույժների ասոցիացիայի» նախագահի հետ՝ նշել է առողջապահության նախարար Անահիտ Ավանեսյանը:

 

Հանդիպման նպատակն էր նախ հասկանալ՝ ինչի կարիք ունեն պլաստիկ վիրաբույժներն ու այս կենտրոնները, լսել մասնագետների դիտարկումները, որպեսզի արվի հնարավոր ամենը` նվազագույնի հասցնելու այս ոլորտում գրանցվող անհաջող ելքերով դեպքերը:

 

Նախարարը նկատել է` ոլորտը դինամիկ զարգանում է, սակայն մեկ-երկու դեպքը խաթարում է ամբողջ ձեռքբերվածն ու ստվեր թողնում ոլորտի վրա:

 

Պլաստիկ վիրաբուժության գծով ԱՆ խորհրդատու, «Հայաստանի պլաստիկ վիրաբույժների ասոցիացիայի» նախագահ Աննա Սարգսյանը ներկայացրել է օրակարգային խնդիրները, առողջապահության նախարարության ստացած բողոքների ու վերջին 2 տարում գրանցված հետվիրահատական բարդությունների դեպքերի հիման վրա արված մասնագիտական վերլուծությունները:

 

Իրավական դաշտը կարգավորելու համար այս պահին մշակվում են նոր ուղեցույցներ, նաև խստացվում է լիցենզիա ստանալու կարգը:

 

Հարակից մասնագիտացում ունեցող բժիշկների համար պարտադիր կդառնա նեղ մասնագիտական օրդինատուրան:

 

Մի քանի ժամ տևած հանդիպմանը մասնագետները ներկայացրել են իրենց առաջարկներն ու պատրաստակամություն հայտնել մեկտեղել ջանքերը՝ լրացնելու ոլորտի բացերը:

 

Նախարարի առաջարկով այս թեմայով, մասնագետների ավելի լայն շրջանակով, կկազմակերպվի համաժողով: