ԱՄՆ-ն հանեց «Ռոսնեֆթի» գերմանական ակտիվները պատժամիջոցների ցուցակից

Գերմանիայի տնտեսության նախարար Կատարինա Ռայխեն հայտարարել է, որ ԱՄՆ-ն պաշտոնապես հաստատել է՝ «Ռոսնեֆթի» նկատմամբ սահմանված պատժամիջոցները չեն տարածվում նրա գերմանական կառավարմամբ գտնվող ակտիվների վրա, հայտնում է Reuters-ը։

Ռայխեի խոսքով՝ Վաշինգտոնը տրամադրել է գրավոր երաշխիքներ, ըստ որոնց սահմանափակումները չեն գործի, քանի որ գերմանական ստորաբաժանումները լիովին առանձնացված են մայր ընկերությունից։

Հոկտեմբերի 22-ին ԱՄՆ ֆինանսների նախարարությունը, Դոնալդ Թրամփի երկրորդ նախագահության ընթացքում առաջին անգամ, հայտարարեց պատժամիջոցների նոր փաթեթ՝ ուղղված «Ռոսնեֆթի» և «Լուկոիլի» դեմ։ Սակայն, ինչպես պարզվեց, դրանք չեն ընդգրկում Գերմանիայում գտնվող «Ռոսնեֆթի» ակտիվները, որոնք ներառում են ընկերության բաժնեմասերը երեք խոշոր նավթավերամշակող գործարաններում՝ PCK (Շվեդտե), Miro (Կարլսռուե) և Bayernoil (Ֆոբուրգ)։

Գերմանիայի տնտեսական նախարարությունը դեռ սեպտեմբերին երկարացրել էր Rosneft Deutschland GmbH և RN Refining & Marketing GmbH ընկերությունների արտաքին կառավարման ժամկետը մինչև 2026 թվականի մարտի 10-ը, նշելով, որ այս որոշումը կապված է երկրի էներգետիկ անվտանգության օրենքի հետ, քանի որ այդ գործարանները մատակարարում են վառելիք ինչպես գերմանական բենզալցակայաններին, այնպես էլ օդանավակայաններին։