«Մենք այլևս մրցունակ չենք». Կատերինա Ռայխեն

Գերմանիայի տնտեսության նախարար Կատերինա Ռայխեն հայտարարել է, որ երկիրը գտնվում է տնտեսական անկման փուլում և ներկայումս կորցրել է իր մրցունակությունը։ Նրա խոսքով՝ Գերմանիան հայտնվել է ԱՄՆ-ի և Չինաստանի միջեւ առևտրային լարվածության կենտրոնում՝ փորձելով պահպանել բաց շուկաները և միաժամանակ պաշտպանել իր ազգային շահերը։ «Այն, թե ինչպես կհաղթահարենք այս իրավիճակը, կորոշի՝ կմնանք արդյոք որպես իրական տնտեսական տերություն», — նշել է Ռայխեն։

Նախարարը կոչ է արել իրականացնել հիմնարար բարեփոխումներ ինչպես երկրի, այնպես էլ Եվրամիության մակարդակով, ընդգծելով, որ ԵՄ-ն պետք է դադարի իրեն պահել որպես «կարգավորող արգելակ»։ Ռայխեի խոսքով՝ գերմանական բիզնեսը տուժում է ոչ միայն չափազանց վերահսկողությունից, այլ նաև էներգակիրների բարձր գներից և սոցիալական համակարգի ծանրությունից, որը դարձել է աշխատանքի արժեքի հիմնական բեռ։

Գերմանիային արդեն երրորդ տարին է սպառնում ռեցեսիա։ Տնտեսական աճը կանգ է առել՝ դառնալով երկրորդ համաշխարհային պատերազմից ի վեր ամենաերկարատև կանգառը։ Վերջին հինգ տարում երկրի ՀՆԱ-ն գրեթե չի աճել․ 2023-ին և 2024-ին այն նվազել է համապատասխանաբար 0,3 և 0,2 տոկոսով, իսկ 2025-ի երկրորդ եռամսյակում՝ ևս 0,3 տոկոսով։ Ընդհանուր տնտեսական կորուստները վերջին հինգ տարում գնահատվում են մոտ 735 միլիարդ եվրո։