Մոդին հրաժարվել է մեկնել ԱՍԵԱՆ-ի գագաթնաժողով

Հնդկաստանի վարչապետ Նարենդրա Մոդին չի մեկնել Մալայզիայում անցկացվող Ասեանի գագաթնաժողովին (հոկտեմբերի 26–28)՝ որպեսզի խուսափի ԱՄՆ նախագահի Դոնալդ Թրամփի հետ հանդիպումից և հնարավոր խոսակցությունից Պակիստանի թեմայով, հայտնում է Bloomberg-ը՝ հղում անելով աղբյուրներին։

Ըստ հաղորդման՝ Մոդին մտավախություն ուներ, որ Թրամփը կրկին կհիշեցնի իր հայտարարությունները այն մասին, թե իբր միջնորդել է Հնդկաստանի և Պակիստանի միջև զինադադարի հասնելու հարցում։ Նյու Դելիում այդ պնդումները մշտապես մերժվել են։ Վարչապետի թիմը նաև նշել է, որ Թրամփի հետ հանդիպումը չէր խոստանում իրական արդյունքներ, իսկ նախորդ շաբաթվա հեռախոսազրույցն էլ չարդարացրեց սպասումները։

Bloomberg-ի տվյալներով՝ Մոդին վախեցել է, որ Թրամփի ցանկացած հրապարակային մեկնաբանություն Պակիստանի վերաբերյալ կարող է օգտագործվել նրա մրցակիցների կողմից Բիհարի նահանգի ընտրություններում՝ վնասելով իշխող կուսակցության վարկանիշին։ Ավելի վաղ Թրամփը պնդել էր, որ իր հարաբերությունները Մոդիի հետ «շատ լավն են» և որ Հնդկաստանը համաձայնել է նվազեցնել ռուսական նավթի գնումները։