Իրանական ռիալը կտրուկ արժեզրկվել է․ դոլարը հասել է ռեկորդային 1,8 միլիոնի

Իրանի ազգային արժույթը՝ ռիալը, կտրուկ անկում է գրանցել և ապրիլի 29-ի դրությամբ հասել ռեկորդային մակարդակի՝ մեկ դոլարի դիմաց մոտ 1,8 միլիոն ռիալ։ Այս մասին հայտնում է The Washington Post-ը՝ նշելով, որ արժեզրկումը տեղի է ունեցել ընդամենը մի քանի օրվա ընթացքում։

Ավելի վաղ ռիալը որոշ ժամանակ պահպանել էր հարաբերական կայունություն՝ պայմանավորված ներմուծման և արտահանման սահմանափակ ծավալներով։ Մարտի վերջին այն նույնիսկ որոշ չափով ամրապնդվել էր՝ ԱՄՆ-ի կողմից իրանական նավթի վաճառքի մասնակի թույլտվությունից հետո։ Սակայն հետագայում իրավիճակը սրվել է՝ Օրմուզի նեղուցի շուրջ լարվածության և փոխադարձ սահմանափակումների պատճառով, ինչը բացասաբար է ազդել տնտեսական միջավայրի վրա։

Փորձագետների գնահատմամբ՝ ռիալի արժեզրկումը կարող է խորացնել երկրում արդեն առկա բարձր գնաճը, քանի որ Իրանը մեծապես կախված է ներմուծումից՝ ներառյալ սննդամթերքը, դեղերը և տեխնիկան։ Չնայած իշխանությունները նախկինում իրականացրել են արժույթի դենոմինացիա, այդ քայլը չի կանխել անկումը, իսկ գների աճը դարձել է սոցիալական դժգոհությունների պատճառներից մեկը։