Reuters․ Եվրոպացիները զարմացած են եղել ԱՄՆ պատվիրակության անտեղյակությունից Իրանի հետ բանակցություններում

Ժնևում Իրանի հետ անցկացված բանակցությունների ընթացքում եվրոպացի պաշտոնյաները ստիպված են եղել ամերիկյան պատվիրակությանը բացատրել ուրանի հարստացման և Իրանի միջուկային ծրագրի հիմնական սկզբունքները։ Այս մասին հայտնում է Reuters-ը՝ հղում անելով դիվանագիտական աղբյուրներին։

Աղբյուրներից մեկի խոսքով՝ եվրոպացի դիվանագետները զարմացած են եղել այն հանգամանքից, որ ԱՄՆ ներկայացուցիչները բավարար պատկերացում չեն ունեցել քննարկվող տեխնիկական հարցերի վերաբերյալ։ «Ինչպե՞ս կարելի է բանակցել, եթե չես հասկանում հիմնական սկզբունքները», — նշել է եվրոպացի դիվանագետներից մեկը։

Reuters-ի փոխանցմամբ՝ Զենքի վերահսկման ասոցիացիայի փորձագետ Քելսի Դևենպորտը նույնպես քննադատել է ԱՄՆ նախագահի հատուկ ներկայացուցիչ Սթիվ Ուիթքոֆին՝ նշելով, որ նա թույլ է տվել մի շարք փաստացի սխալներ և սխալ է ներկայացրել Իրանի միջուկային ծրագրի որոշ բաղադրիչներ։ Փորձագետի խոսքով՝ բանակցողը պարտադիր չէ միջուկային ոլորտի մասնագետ լինի, սակայն նրա կողքին պետք է լինեն համապատասխան փորձագետներ։ Ավելի վաղ Իրանի գերագույն առաջնորդ Մոջթաբա Խամենեին արգելել էր երկրից դուրս հանել հարստացված ուրանը։