Իրանը սպառնացել է պատասխանել ԱՄՆ-ին՝ օդային տարածքի խախտման համար

Իրանի Իսլամական հեղափոխության պահապանների կորպուսը հայտարարել է, որ ԱՄՆ-ը ներխուժել է Իրանի օդային տարածք, և Թեհրանը իրեն իրավունք է վերապահում պատասխան քայլերի դիմել։ Կոշտ հայտարարությունը հրապարակել է Tasnim գործակալությունը։

ԿՍԻՐ-ի հաղորդագրության մեջ նշվում է, որ ամերիկյան բանակը շարունակել է «ագրեսիվ գործողություններն ու միջամտողական արկածախնդրությունը» տարածաշրջանում՝ ներխուժելով Իրանի օդային տարածք Պարսից ծոցի շրջանում։ Իրանական կողմը հայտարարել է, որ պատասխան գործողությունների իրավունքը համարում է «օրինական և բացարձակ»։

Իրանի ռազմական կառույցի տվյալներով՝ իրանական ուժերը խոցել են ամերիկյան MQ-9 անօդաչու սարքը, ինչպես նաև ստիպել են Իրանի օդային տարածքը լքել F-35 կործանիչին և RQ-4 հետախուզական դրոնին։ Ավելի վաղ ԱՄՆ ԶՈւ Կենտրոնական հրամանատարությունը՝ CENTCOM-ը, հաստատել էր, որ ամերիկյան ուժերը հարվածներ են հասցրել Իրանի ուղղությամբ՝ հայտարարելով, որ գործողություններն իրականացվել են ամերիկացի զինծառայողների անվտանգությունն ապահովելու նպատակով։