Լուկաշենկոն Մակրոնին առաջարկել է հանդիպել իր և Պուտինի հետ Մինսկում

Բելառուսի նախագահ Ալեքսանդր Լուկաշենկոը հայտնել է, որ Ֆրանսիայի նախագահ Էմանուել Մակրոնի հետ հեռախոսազրույցի ընթացքում առաջարկել է նրան այցելել Մինսկ և հանդիպել նաև Ռուսաստանի նախագահ Վլադիմիր Պուտինի հետ։

Լուկաշենկոյի խոսքով՝ ինքը կատակով ասել է, որ եթե Մակրոնը չի ցանկանում մեկնել Մոսկվա, ապա կարող է գալ Մինսկ, որտեղ ինքը և Պուտինը պատրաստ կլինեն հանդիպել նրան։ Բելառուսի նախագահի պնդմամբ՝ Մակրոնը չի բացառել նման հանդիպման հնարավորությունը, սակայն նշել է, որ նախ պետք է խորհրդակցի Եվրամիության գործընկերների հետ։

Լուկաշենկոն նաև հայտնել է, որ համաձայնել է հաջորդ շաբաթ ընդունել Մակրոնի հատուկ ներկայացուցչին՝ քննարկելու առկա խնդիրները։ Նա Ֆրանսիայի նախագահին կոչ է արել դառնալ Եվրոպայում խաղաղ երկխոսության առաջմղման «շարժիչ ուժը»։