Ոսկին առաջ է անցել ԱՄՆ պետական պարտատոմսերից՝ որպես պահուստային հիմնական ակտիվ

Եվրոպական կենտրոնական բանկի տվյալներին հղումով Financial Times-ը հայտնում է, որ 2025 թվականի վերջի դրությամբ ոսկին դարձել է համաշխարհային կենտրոնական բանկերի ամենախոշոր պահուստային ակտիվը՝ առաջ անցնելով ԱՄՆ պետական պարտատոմսերից։

Տվյալների համաձայն՝ կենտրոնական բանկերի պահուստներում ոսկու մասնաբաժինը հասել է 27 տոկոսի՝ մեկ տարվա ընթացքում աճելով 7 տոկոսային կետով։ Միևնույն ժամանակ ԱՄՆ պետական պարտատոմսերի բաժինը նվազել է՝ 25 տոկոսից հասնելով 22 տոկոսի։

Հրապարակման համաձայն՝ մի շարք երկրներում դոլարից կախվածությունը նվազեցնելու միտումն ավելի է ուժեղացել 2022 թվականից հետո՝ Ռուսաստանի արտարժութային պահուստների սառեցման ֆոնին։

Վերջին տարիներին ոսկու գինը զգալի աճ է արձանագրել՝ պայմանավորված կենտրոնական բանկերի պահանջարկով և ներդրողների՝ անկայունության պայմաններում ավելի ապահով ակտիվներ ընտրելու ցանկությամբ։ 2025 թվականին ոսկու արժեքը, ըստ հրապարակման, աճել է մոտ 65 տոկոսով։

Նյութում նաև նշվում է, որ ռուսական սառեցված պետական ակտիվների ֆոնին ոսկու թանկացումը զգալիորեն բարձրացրել է Ռուսաստանի ոսկու պահուստների գնահատված արժեքը։