Մահմուդ Ահմադինեժադը մեղադրել է Իրանի խորհրդարանի խոսնակի ընտանիքին կաշառակերության մեջ

Իրանի նախագահ Մահմուդ Ահմադինեժադը մեղադրել է Իրանի խորհրդարանի խոսնակ Ալի Լարիջանիին և նրա ընտանիքին կաշառակերության մեջ: Դա տեղի է ունեցել օրենսդիր մարմնի առջև Ահմադինեժադի ելույթի ժամանակ. փոխանցում է Reuters-ը:

Ահմադինեժադը խորհրդարանում ցուցադրել է խոսնակի եղբայր Ֆազելի Լարիջանիի և նախկին դատախազ Սաիդ Մորթազիի միջև խոսակցության ձայնագրությունը: Ձայնագրությունը հստակ չի եղել, և Ահմադինեժադի մեկնաբանությամբ՝ Ալի Լարիջանին առաջարկել է նախկին դատախազին իր եղբոր օգնությունը բիզնես նախագծերում նրա մասնակցության դիմաց:

Ահմադինեժադը հայտարարել է, որ ինքն ունի նաև 24-25 ժամ տևողությամբ ավելի որակյալ ձայնա և տեսագրություններ, որոնք ապացուցում են Իրանի խորհրդարանի խոսնակի բոլոր 5 եղբայրների մասնակցությունը կաշառակերության մեջ:

Մահմուդ Ահմադինեժադի ելույթը փորձ էր պաշտպանել Իրանի աշխատանքի հարցերով նախարար Աբդուլռեզա Շեյխոլիսլամին, ում խորհրդարանը ցանկանում էր ազատել աշխատանքից:

Անմասն չի մնացել նաև այն հանգամանքը, որ ս./թ. նախագահական ընտրություններում խոսնակ Ալի Լարիջանին ֆավորիտ է համարվում:

Խոսնակը հերքում է ներկայացրած բոլոր մեղադրանքները: Հայտնի է դարձել, որ նա մտադիր է դատի տալ Ահմադինեժադին:

Նշենք, որ Ահմադինեժադը չի կարող մասնակցել կայանալիք նախագահական ընտրություններն, քանի որ 2-րդ անգամ անընդմեջ զբաղեցրել է երկրի նախագահի պաշտոնը, սակայն փորձագետները վստահ են, որ նա քիչ ազդեցություն չի ունենալու երկրի քաղաքական կյանքում: