ԶԼՄ․ ՖԻՖԱ-ի նախագահը պաշտոնը պահպանելու համար պատրաստվում է դիմել Թրամփի վարչակազմին

Ֆուտբոլի միջազգային ֆեդերացիայի (ՖԻՖԱ) նախագահ Ջաննի Ինֆանտինոն մտադիր է դիմել ԱՄՆ նախագահ Դոնալդ Թրամփի վարչակազմին՝ առաջիկա ընտրություններում իր պաշտոնը պահպանելու նպատակով։ Այդ մասին հայտնում է The New York Post-ը։

Պարբերականի տվյալներով՝ օգոստոսի 3-ին Ինֆանտինոն նախատեսում է հանդիպել ԱՄՆ պետքարտուղար Մարկո Ռուբիոյի հետ։ Աղբյուրի խոսքով՝ պաշտոնապես հանդիպումը ներկայացվում է որպես քննարկում այն մասին, թե ինչպես կարող է ֆուտբոլը դառնալ ԱՄՆ-ի «փափուկ ուժի» գործիք, սակայն իրական նպատակը ՖԻՖԱ-ի նախագահի պաշտոնը պահպանելու հարցում աջակցություն ստանալն է։

Ավելի վաղ The Telegraph-ը հայտնել էր, որ Ինֆանտինոն դիտարկում է աշխարհի առաջնության կառավարման մեջ մասնավոր ներդրողների ներգրավման տարբերակը։ Այդ նախաձեռնությանը դեմ են հանդես եկել ՈՒԵՖԱ-ում՝ զգուշացնելով, որ գործարքի իրականացվելու դեպքում կարող են բոյկոտել ՖԻՖԱ-ի մրցաշարերը։ Հաղորդվում է նաև, որ Անգլիայի և Ուելսի ֆուտբոլային ասոցիացիաները հետ են կանչել Ինֆանտինոյի թեկնածությանը սատարող իրենց նամակները 2027 թվականի մարտի 18-ին նախատեսված ՖԻՖԱ-ի նախագահի ընտրություններից առաջ։