Ամուսնությունից մեկ օր առաջ․ Ռոնալդուն և Ջորջինան ստորագրել են կարևոր փաստաթուղթ

Պորտուգալիայի հավաքականի և Սաուդյան Արաբիայի «Ալ-Նասր» ակումբի հարձակվող Կրիշտիանու Ռոնալդուն ու նրա ընտրյալը՝ մոդել Ջորջինա Ռոդրիգեսը, ամուսնությունից մեկ օր առաջ՝ օգոստոսի 10-ին, ամուսնական պայմանագիր են ստորագրել։

Պորտուգալական Jornal de Notícias պարբերականի փոխանցմամբ՝ փաստաթուղթը սահմանում է ամուսինների գույքային հարաբերությունները։ Զույգը նախընտրել է ունեցվածքի տարանջատման սկզբունքը, որի համաձայն՝ ամուսիններից յուրաքանչյուրը պահպանելու է ինչպես մինչև ամուսնությունը ձեռք բերած սեփականությունը, այնպես էլ հետագայում ձեռք բերվող ակտիվների նկատմամբ լիարժեք իրավունքները։

Միևնույն ժամանակ, եթե Ռոնալդուն և Ռոդրիգեսը որևէ գույք ձեռք բերեն համատեղ, այն կհամարվի նրանց հավասար բաժնային սեփականությունը։

Պարբերականը, հղում անելով իր տրամադրության տակ հայտնված ամուսնության վկայականին, նշում է, որ զույգի մշտական բնակության վայրը գրանցված է Սաուդյան Արաբիայի մայրաքաղաք Էր Ռիյադում։ Նշվում է նաև, որ ամուսնությունից հետո կողմերից ոչ մեկը չի փոխել իր ազգանունը։