F1․ ի՞նչ է կատարվում Cadillac-ում և Haas-ում․ Բենզոնը՝ թիմերի խնդիրների մասին

Ֆորմուլա 1-ի ամառային դադարից հետո մրցաշրջանը վերադառնում է այս շաբաթավերջին՝ Նիդեռլանդների Գրան պրիով։ BBC-ի F1-ի թղթակից Էնդրյու Բենսոնը անդրադարձել է Cadillac-ի, Aston Martin-ի և Haas-ի իրավիճակին, ինչպես նաև 2027 թվականի օրացույցի հնարավոր փոփոխություններին։

Cadillac-ը վերակազմավորվում է։ Թիմի սեփականատեր Դեն Թոուրսը որոշել է հեռացնել թիմի ղեկավար Գրեմ Լոուդոնին և նրան փոխարինել փորձառու Մարչին Բուդկովսկիով։ Cadillac-ը մրցաշրջանի առաջին 11 մրցարշավներից հետո դեռևս ոչ մի միավոր չի վաստակել և միջինում զգալիորեն զիջում է մյուս թիմերին։ Թիմը նաև պարբերաբար բախվում է հուսալիության խնդիրների, հատկապես՝ արգելակների գերտաքացմանը։

Aston Martin-ի համար կարևոր է Honda-ի նոր շարժիչը։ Նիդեռլանդների Գրան պրիում Honda-ն ներկայացնելու է նոր շարժիչ, որի արդյունավետությունը թիմի համար առանցքային նշանակություն ունի։ Նախնական գնահատականներով՝ նախորդ շարժիչը առաջատարներից մոտ 1,5 վայրկյանով զիջում էր մեկ շրջանի ընթացքում։ Նոր տարբերակով ակնկալվում է այդ տարբերության մոտ մեկ երրորդի կրճատում։ Շարժիչի առաջընթացը հատկապես կարևոր է Ֆերնանդո Ալոնսոյի համար, քանի որ նա դեռ պետք է որոշի՝ արդյոք շարունակել ելույթները Aston Martin-ի կազմում հաջորդ մրցաշրջանում։

Haas-ը շարունակում է պայքարել ավելի սահմանափակ ռեսուրսներով։ Թիմը մրցաշրջանը լավ էր սկսել՝ առաջին երեք մրցարշավներում անընդմեջ միավորներ վաստակելով և Չինաստանում Օլիվեր Բիրմանի միջոցով հասնելով հինգերորդ տեղին։ Սակայն մրցակիցների թարմացումները Haas-ին աստիճանաբար հետ մղեցին․ թիմը վեցերորդ ամենաարագից դարձել է ութերորդը որակավորման փուլերում։ Միաժամանակ Haas-ը շարունակում է մնալ կոնստրուկտորների առաջնության 7-րդ հորիզոնականում։

Գերմանական Գրան պրիի վերադարձը դեռ հեռանկարային է։ F1-ի նախագահ Ստեֆանո Դոմենիկալին նշել է, որ Հոքենհայմի հետ քննարկումները վերսկսվել են, սակայն Գերմանիայի վերադարձը մոտակա ժամանակում քիչ հավանական է։ Ամեն ինչ կախված է մրցարշավի ֆինանսական պայմաններից։

Իսկ եթե Մերձավոր Արևելքում իրավիճակը չկայունանա, 2027 թվականի մրցաշրջանի օրացույցը կարող է փոփոխվել։ Եթե Բահրեյնը և Սաուդյան Արաբիան չկարողանան հյուրընկալել մրցարշավներ, հնարավոր տարբերակներից մեկը մրցաշրջանը Ավստրալիայում սկսելն է, այնուհետև Չինաստանում և Ճապոնիայում մրցարշավներ անցկացնելը։