Կահիրեում 2-րդ անգամ են հարձակվել Ահմադինեժադի վրա (տեսանյութ)

Իրանի նախագահ Մահմուդ Ահմադինեժադը Կահիրեում իր գտնվելու ընթացքում արդեն 2-րդ անգամ է հարձակման ենթարկվում սիրիական ընդդիմության ներկայացուցիչների կողմից. տեղեկացնում է Ալ Արաբիան:

Ահմադինեժադը ներկա էր գտնվում իրանցի դիվանագետներից մեկի տանը կազմակերպված պաշտոնական ընդունելությանը, որի ժամանակ նրան է մոտեցել ագրեսիվ տրամադրված մի քաղաքացի, ով բղավել է՝ «Մա՜հ Ահմադինեժադին», «Մա՜հ Բաշար Ասադին»: Դեռևս հայտնի չէ, թե ինչպես է նա կարողացել անցնել թիկնապահների կողքով:

Անվտանգության ուժերը նրան հեռացրել են նախագահի մոտից, Իրանի առաջնորդը չի տուժել:

Խուզարկության ժամանակ պարզվել է, որ քաղաքացին զինված չի եղել: Ահմադինեժադի թիկնապահները ցանկացել են անձամբ ձերբակալել և հարցաքննել նրան, սակայն եգիպտացիների պահանջով քաղաքացուն հանձնել են մոտական ոստիկանության բաժին: Նրա անունն ու ազգային պատկանելությունը չի հայտնվում:

Հիշեցնենք, որ մի քանի օր առաջ Կահիրեում անհայտ մի անձ, հրելով Իրանի նախագահ Մահմուդ Ահմադինեժադի թիկնապահներին, փորձել է իր կոշիկը շպրտել նախագահի վրա վերջինիս՝ Ալ Հուսեինի՝ մզկիթից դուրս գալու ժամանակ:

Դիպվածը տեղի է ունեցել Ալ Հուսեինի մզկիթի մոտ, որտեղ Իրանի նախագահը ժամանել էր Եգիպտոս իր այցի շրջանակներում: Տեսաերիզում երևում է, թե ինչպես անհայտ մի անձնավորություն հրում է թիկնապահներին՝ կոշիկը շպրտելու համար, որը մուսուլմանական երկրներում ծայրաստիճան վիրավորանք է համարվում:

Թիկնապահներն արագությամբ չեզոքացրել են կարգը խախտողին, որից հետո Իրանի նախագահը հանգստությամբ նստել է ավտոմեքենա:

Հիշեցնենք, որ Իրանի նախագահը ժամանել էր Եգիպտոս իսլամական համագործակցության կազմակերպության կառավարության և երկրի ղեկավարների հանդիպման շրջանակներում: Իրանի նախագահի այցը Եգիպտոս վերջին 33 տարվա ընթացքում առաջին անգամ էր 2 երկրների միջև հարաբերությունների խզումից հետո: