ԱՄՆ-ի նոր պետքարտուղարն Իրանին կոչ է անում ճիշտ որոշում կայացնել

ԱՄՆ-ի պետքարտուղար Ջոն Քերին փետրվարի 8-ին կայացած իր առաջին մամլո խորհրդակցության ժամանակ Իրանին կոչ է արել ճիշտ որոշում կայացնել միջուկային ծրագրի հարցում. մեջբերում է Agence France-Presse-ը:

Քերիի խոսքերով՝ արևմտյան երկրների և Իրանի միջև հետագա հարաբերությունների ողջ ընթացքը կախված է այն ընտրությունից, որը կանի Թեհրանը: Եթե իսլամական հանրապետությունում շարունակեն միջուկային ծրագրի ընդլայնումը, ապա Իրանի նկատմամբ նոր պաժամիջոցներ կկիրառվեն, և երկիրը կհայտնվի մեծ իզոլացման մեջ:

«Սակայն,-հավելել է Քերին,-եթե Ղազախստանում օրերս կայանալիք բանակցությունների ընթացքում Իրանը հստակ զեկույց ներկայացնի իր միջուկային ծրագրի մասին, ապա ԱՄՆ-ը պատրաստ է գնալ հարցի դիվանագիտական լուծմանը»:

Հիշեցնենք, որ փետրվարի 25-ին Ղազախստանում կայանալու է Իրանի միջուկային հարցի շուրջ մեծ վեցնյակի (Ռուսաստան, ԱՄՆ, Մեծ Բրիտանիա, Ֆրանսիա, Չինաստան, Գերմանիա) բանակցությունների նոր փուլը: