Գելլաքը վտանգավո՞ր է․ ինչ պետք է իմանալ եղունգների երկարատև ծածկույթի մասին

Գելլաքը շատերի նախընտրած մատնահարդարման տարբերակներից է․ այն երկար ժամանակ պահպանում է փայլը, չի վնասվում այնքան արագ, որքան սովորական լաքը, և թույլ է տալիս եղունգներին խնամված տեսք հաղորդել։ Սակայն դրա հաճախակի օգտագործումը կարող է որոշակի ռիսկեր ունենալ մաշկի և եղունգների առողջության համար։

Ի՞նչ վնաս կարող է պատճառել գելլաքը։

Մաշկաբանների ուսումնասիրությունների համաձայն՝ գելլաքի օգտագործման հետ կապված հիմնական խնդիրներից են եղունգների փխրունությունը, շերտավորումը և ալերգիկ ռեակցիաները։ Ռիսկերը կախված են օգտագործվող նյութերից, ծածկույթի կիրառման ու հեռացման եղանակից և ուլտրամանուշակագույն լամպի ազդեցությունից։ 

1. Ալերգիկ ռեակցիաներ

Գելլաքի բաղադրության մեջ կարող են լինել ակրիլատներ՝ քիմիական նյութեր, որոնք որոշ մարդկանց մոտ առաջացնում են ալերգիկ կոնտակտային դերմատիտ։ Ախտանշաններն են՝

• մատների մաշկի կարմրություն և քոր,

• այտուցվածություն,

• մաշկի չորություն և ճաքեր,

• եղունգի թիթեղի վնասում կամ եղունգի անջատում եղունգային հունից։

Ռիսկը մեծանում է, երբ չչորացած նյութը շփվում է մաշկի հետ կամ լաքը պատշաճ կերպով չի կարծրանում լամպի տակ։ Ալերգիան կարող է առաջանալ նույնիսկ այն մարդկանց մոտ, ովքեր նախկինում գելլաք են օգտագործել առանց խնդիրների։ 

2. Ուլտրամանուշակագույն լամպի ազդեցությունը

Գելլաքը կարծրացնելու համար օգտագործվող լամպերը կարող են արձակել UVA ճառագայթներ։ Կրկնվող ազդեցությունը կարող է նպաստել ձեռքերի մաշկի վաղաժամ ծերացմանը, իսկ մաշկի քաղցկեղի ռիսկի հարցում առկա տվյալները դեռ սահմանափակ են։ Ներկայումս այդ լամպերի հետ կապված ընդհանուր ռիսկը գնահատվում է ցածր, բայց ոչ զրոյական։

Ռիսկը նվազեցնելու համար մասնագետները խորհուրդ են տալիս մատնահարդարումից առաջ ձեռքերի բաց հատվածներին քսել լայն սպեկտրի, ջրակայուն՝ առնվազն SPF 30 պաշտպանությամբ արևապաշտպան քսուք կամ օգտագործել մատների ծայրերը բաց ձեռնոցներ։ 

3. Եղունգների թուլացում և վնասում

Գելլաքի հաճախակի կիրառումը, հատկապես ոչ ճիշտ հեռացումը, կարող է հանգեցնել եղունգների բարակման, փխրունության և շերտավորման։ Ծածկույթը պոկելը կամ քերելը կարող է վնասել եղունգի մակերեսը։ Հեռացման ընթացքում օգտագործվող ացետոնն էլ կարող է չորացնել եղունգներն ու շրջակա մաշկը։

Ինչպե՞ս նվազեցնել վնասների հավանականությունը։

• Գելլաքը կիրառել փորձառու մասնագետի մոտ՝ պահպանելով հիգիենայի կանոնները։

• Թույլ չտալ, որ չչորացած նյութը դիպչի մաշկին։

• Չպոկել և չքերծել ծածկույթը սեփական ուժերով։

• Ժամանակ առ ժամանակ դադար տալ գելլաքի օգտագործմանը, հատկապես եթե եղունգները բարակել կամ վնասվել են։

• Քորի, այտուցի, կարմրության կամ եղունգի անջատման դեպքում դադարեցնել օգտագործումը և դիմել մաշկաբանի։

• Գելլաքը բոլորի համար վտանգավոր չէ, և ճիշտ կիրառման դեպքում առողջական լուրջ խնդիրների հավանականությունը համեմատաբար փոքր է։ Այնուամենայնիվ, ալերգիկ ռեակցիաները, եղունգների վնասումը և լամպի կրկնվող ճառագայթային ազդեցությունը ռիսկեր են, որոնք չպետք է անտեսել։ Կարևոր է հետևել անվտանգության կանոններին և արձագանքել մաշկի կամ եղունգների ցանկացած փոփոխության։