Airbnb-ի նոր կանոններով հյուրերն այլևս պարտավոր չեն մաքրել բնակարանները լքելուց առաջ

Airbnb կացարանների ամրագրման հարթակի նոր կանոնները տարաձայնություններ են առաջացրել բնակարանների սեփականատերերի և հյուրերի միջև։ Փոփոխությունների համաձայն՝ տանտերերն այլևս չեն կարող հյուրերից պահանջել կատարել այն մաքրության աշխատանքները, որոնք սովորաբար իրականացնում են պրոֆեսիոնալ հավաքարարները. փոխանցում է BBC-ն։

Նոր կանոնները կկիրառվեն նոյեմբերի 20-ից ամբողջ աշխարհում կատարվող ամրագրումների նկատմամբ։ Դրանց համաձայն՝ տանտերերը կարող են սահմանել յոթ հիմնական տնային կանոն և ավելացնել այլ՝ ողջամիտ պահանջներ։

Մասնավորապես, տանտերերն այլևս չեն կարող հյուրերից պահանջել լվանալ և տեղը դնել սպասքը, հանել անկողնային սպիտակեղենը, սկսել լվացքի մեքենան կամ աղբը դուրս տանել տարածքից։ Փոխարենը նրանք կարող են խնդրել օգտագործված սպասքը դնել լվացարանի մեջ, հավաքել սրբիչները, իսկ աղբն ու վերամշակման ենթակա թափոնները տեսակավորել համապատասխան աղբամաններում։ Հյուրերից կարող են նաև պահանջել բնակարանից դուրս գալիս անջատել օդորակիչը։

Փոփոխությունները դրական են ընդունել այն հյուրերը, որոնք դժգոհել են երկարատև պարտականությունների ցանկերից՝ հատկապես այն դեպքում, երբ կացարանի համար արդեն վճարել են մաքրման հավելավճար։

Օրինակ՝ Ջեսիկա Նյուհուկը պատմել է, որ Ֆլորիդայում 11 հոգանոց ընտանեկան հավաքույթի համար ամրագրած Airbnb բնակարանում իրենցից պահանջել են լվանալ և ծալել սրբիչները, մաքրել անկողնային պարագաներն ու խոհանոցը, ինչպես նաև ավլել և լվանալ հատակները։ Այդ ամենի համար նրանք վճարել էին 250 դոլար մաքրման վճար։

«Մենք ամեն ինչի վերաբերյալ կանոններ ունեինք, և հանգիստն ամենևին էլ հանգստացնող չէր», - նշել է նա՝ հավելելով, որ նման պայմաններում հյուրանոցում մնալը երբեմն ավելի մատչելի է։

Սակայն նոր կանոնները դժգոհություն են առաջացրել նաև կացարանների սեփականատերերի շրջանում։ Նրանց մի մասը մտահոգված է, որ հյուրերի կողմից լրացուցիչ խառնաշփոթը կմեծացնի մաքրման ծախսերը և կդժվարացնի բնակարանները հաջորդ հյուրերի ժամանումից առաջ պատրաստելու գործընթացը։

Ուելսում կացարանների սեփականատեր Լիզա Քլյուզը պատմել է, որ հյուրերի հեռանալուց հետո իր երեք սենյականոց բնակարանը հայտնվել է անմխիթար վիճակում՝ կոտրված բաժակներով, հատակին թափված տարաներով, սեղանին թողնված սննդով և նույնիսկ այգում մնացած ձկան մնացորդներով։ Նրա խոսքով՝ մաքրող անձնակազմից սովորաբար չորս ժամ է պահանջվում բնակարանը հաջորդ հյուրերի համար պատրաստելու համար։

Հյուսիսային Յորքշիրում հանգստյան տնակների համալիրի համասեփականատեր Էնթոնի Մարշն էլ հայտնել է, որ նոր կանոնների պատճառով Airbnb-ում ներկայացված իր 12 կացարաններից հինգի փոխարեն կթողնի միայն երկուսը։

Նրա կարծիքով՝ հյուրերից սպասքը լվանալ կամ աղբը դուրս տանել պահանջելը չափազանցված չէ, հատկապես երբ մաքրման անձնակազմը փոքրաթիվ է, իսկ հյուրերի ժամանման և մեկնելու միջև ժամանակը՝ սահմանափակ։

Մինչդեռ Airbnb կացարաններ ընդունող և կառավարող Մեթ Փորսը կարծում է, որ փոփոխությունները կբարելավեն հյուրերի փորձառությունը՝ առանց էականորեն փոխելու նրանց վարքագիծը։ Նրա խոսքով՝ հյուրերից պահանջվում է միայն կողպել բնակարանը և վերադարձնել բանալիները։

Նշվում է, որ AirROI-ի տվյալներով՝ Airbnb-ի հայտարարությունների 63.2 տոկոսում գանձվում է մաքրման վճար, որի միջին չափը կազմում է 55 ֆունտ ստեռլինգ։

Որոշ սեփականատերեր, դժգոհ լինելով նաև հարթակի միջնորդավճարների բարձրացումից, սկսել են ավելի ակտիվորեն զարգացնել սեփական կայքերն ու սոցիալական ցանցերը՝ հաճախորդներին անմիջապես ներգրավելու և հարթակի վճարներից խուսափելու համար։