ԿՀՎ-ն խոստովանել է իր դերակատարությունը Իրանի` 1953 թ. հեղաշրջմանը

Կենտրոնական հետախուզական վարչությունը հրապարակել է գաղտնի փաստաթղթեր՝ առաջին անգամ խոստովանելով իր դերակատարությունը Իրանում 1953 թ. կազմակերպված ռազմական հեղաշրջմանը. հաղորդում է BBC-ն:

Իրանի՝ ժողովրդավարական սկզբունքներով ընտրված վարչապետ Մոհամեդ Մոսադեղը հեռացվել էր իշխանությունից այն բանից հետո, երբ հայտարարել էր, որ պատրասվում է ազգայնացնել երկրի նավթային արդյունաբերությունը:

Այն, որ ԱՄՆ-ը կապ ունի 1953 թ. իրադարձությունների հետ, իրենց հանրային ելույթներում հայտարարել են 2000 թ. ԱՄՆ պետքարտուղար Մադլեն Օլբրայթը և 2009 թ. նախագահ Բարաք Օբաման, սակայն մինչ այժմ հատուկ ծառայությունները չէին մեկնաբանում այս հարցը:

Փաստաթղթերը հրապարակվել են Ազգային անվտանության արխիվի կողմից՝ հեղաշրջման 60-ամյակի կապակցությամբ:

Դրանցում երևում է, որ բրիտանական MI-6 հատուկ ծառայություններն այն ժամանակ աշխատում էին ԱՄՆ հատուկ ծառայությունների հետ սերտ համագործակցությամբ:

ԿՀՎ-ն և MI-6-ը աջակցություն են ցուցաբերել շահ Մոհամեդ Ռեզա Փահլևիի կողմնակիցներին և ցույցեր կազմակերպել Մոսադեղի քաղաքականության դեմ: Ցուցարարների կողմն է անցել նաև բանակը, և 953 թ. օգոստոսի 19-ին Մոսադեղի կառավարության բոլոր անդամները կա'մ փախել են երկրից, կա'մ ձերբակալվել:

Շահ Փեհլևին վերադարձել է Իրան և դարձել ԱՄՆ-ի դաշնակիցը` մինչև 1979 թ. իսլամական հեղափոխությունը: