Կիևը դադարեցրել է ռուսական գազի ներմղումը. Ուկրաինայի էներգետիկայի նախարարություն

Ինչպես հայտնում է UNIAN-ը, Ուկրաինան կասեցրել է ռուսական գազի ներմղումը: Այդ մասին նախարարների կաբինետի ապրիլի 9-ի նիստից առաջ հայտարարել է Ուկրաինայի էներգետիկայի և ածխարդյունաբերության նախարարի պաշտոնակատար Յուրի Պրոդանը: 

«Մենք այսօրվա դրությամբ գազ չենք ներմղում»,-ասել է Պրոդանը:

Նա դա բացատրել է նրանով, որ ուկրաինական կողմին չի բավարարում գազի գնի այն մակարդակը, որը «Գազպրոմի» կողմից սահմանվել է ապրիլի 1-ից: Դրա հետ մեկտեղ նախարարը հավելել է, որ Ուկրաինան ռուսական կողմի հետ բանակցություններ կվարի հին գնի վերականգնման շուրջ, որը եղել է 2014 թվականի առաջին եռամսյակում:

Պրոդանը հայտնել է, որ «մարտ ամսվա համար մենք գազի դիմաց դեռ չենք վճարել»: Պարտքը կազմում է ավելի քան 550 միլիոն դոլար:

Ավելի վաղ «Գազպրոմի» ղեկավար Ալեքսեյ Միլլերը հայտնել է, որ 2014 թվականի ապրիլից Ուկրաինայի համար գազի գինը կկազմի հազար խորանարդ մետրի դիմաց 485 դոլար:

«Գազի գինն Ուկրաինայի համար կբարձրանա և ապրիլից կկազմի հազար խորանարդ մետրի դիմաց 485 դոլար»,-նշել է Միլլերը:

Մինչ այդ Ուկրաինայի ֆինանսների նախարար Ալեքսանդր Շլապակը Կիևում կայացած մամուլի ասուլիսում հայտարարել է, որ հանրապետության բնակչությանը մատակարարվող բնական գազի գինը մայիսի 1-ից կբարձրանա միջինը 73 տոկոսով, իսկ ջերմային էներգիայինը՝ 40 տոկոսով: