ԱԳՆ-ի կազմակերպած ցուցահանդես-վաճառքի հասույթի որոշ մասը կտրամադրվի կարիքավոր սիրիահայերին

Երևանի քաղաքապետարանում Մայրության և գեղեցկության տոնին նվիրված բարեգործական ցուցահանդես-վաճառքին կմասնակցեն Հայաստանում հավատարմագրված դիվանագիտական ներկայացուցչություններ: Միջոցառումն անցկացվում է Հայաստանի Հանրապետության արտաքին գործերի նախարարության «Բարի գալուստ Հայաստան» դիվանագիտական ասոցիացիայի կողմից:

Ցուցահանդես-վաճառքին իրենց տաղավարներով մասնակցելու են Հայաստանում հավատարմագրված դիվանագիտական ներկայացուցչություններ, ինչպես նաև մի շարք հայ արտադրողներ և գեղարվեստի վարպետներ:

Ցուցահանդես-վաճառքից գոյացած հիմնական հասույթը կնվիրաբերվի Երևանի Ներքին Չարբախի թիվ 130 և Նոր Արեշի թիվ 71 մանկապարտեզների վերանորոգմանը, իսկ հասույթի մի մասը՝ կտրամադրվի կարիքավոր սիրիահայերին:

Միջոցառումը կկայանա ապրիլի 12-ին՝ ժամը 10:00-19:00-ը, Երևանի քաղաքապետարանի նախասրահում (հասցեն՝ Արգիշտի փ. 1): Միջոցառման պաշտոնական բացումը տեղի կունենա ժամը 11:30-ին, իսկ ժամը 18:00-ին խաղարկության արդյունքում կհանձնվեն մի շարք մրցանակներ: Մուտքը հրավիրատոմսերով է: