Ուկրաինան հույս ունի ԱՄՀ-ն ֆինանսական աջակցություն կտրամադրի երկու շաբաթվա ընթացքում

Ինչպես հայտնում է ria.ru-ն, Կիևն ակնկալում է, որ ԱՄՀ-ն կորոշի Ուկրաինային ֆինանսական աջակցություն տրամադրել երկու շաբաթվա ընթացքում: Այս մասին հայտնել է Ուկրաինայի վարչապետ Արսենի Յացենյուկը` Ուկրաինայի ազգային ալիքին տված հարցազրույցի ընթացքում:

«Մենք ընդունել ենք լուրջ բարեփոխումների փաթեթ: Երկու շաբաթվա ընթացքում ակնկալում ենք Արժույթի միջազգային հիմնադրամի որոշման հստակեցում` Ուկրաինային ֆինանսական օգնություն տրամադրելու հարցով»,-ասել է վարչապետը:

Նա նաև նշել է, որ ֆինանսական աջակցություն ստանալուց հետո, պետք է անմիջապես քայլեր ձեռնարկվեն երկրում փոխարժեքը կայունացնելու նպատակով:   

Հիշեցնենք, որ ավելի վաղ Ռուսաստանի ֆինանսների նախարար Անտոն Սիլուանովը հայտնել էր, որ Արժույթի միջազգային հիմնադրամը և մի շարք այլ արևմտյան երկրներ, հնարավոր է, Ուկրաինային տրամադրեն ֆինանսական օգնության առաջին փոխանցումն արդեն 6 մլրդ դոլարի չափով: Ըստ նրա՝ պաշտոնական Մոսկվան առաջարկում է արևմտյան գործընկերներին օգնել Ուկրաինային, որպեսզի նա կարողանա իրականացնել իր պարտավորությունները՝ ներառյալ գազի հաշիվենրը: