Ուկրաինայի իրադրությունը գլխավորը կլինի ԵՄ-ի երկրների ԱԳ նախարարների` Լյուքսեմբուրգում բացվող հանդիպմանը

Ուկրաինայի աղետալի իրադրությունը գերիշխող կլինի Եվրամիության անդամ 28 երկրների ԱԳ նախարարների՝ ապրիլի 14-ին Լյուքսեմբուրգում բացվող հանդիպմանը, որին հաջորդելու է համանման նիստ պաշտպանության նախարարների ձևաչափով: Նախարարները նաև կքննարկեն Ռուսաստանի դեմ պատժամիջոցների խստացման հնարավորությունը և Ուկրաինայում գազի հետ կապված իրադրությունը:

«Նախարարները կքննարկեն Ուկրաինայի արևելքում լարվածության կտրուկ սաստկացումը և գնահատական կտան իրադրության էսկալացմանն արտաքին ուժերի մասնակցությանը»,- ԻՏԱՌ-ՏԱՍՍ-ին հայտնել են ԵՄ-ի արտաքին քաղաքական գերատեսչությունում:

ԵՄ-ի ԱԳ նախարարները նաև կհամաձայնեցնեն իրենց դիրքորոշումները Ռուսաստանի, ԱՄՆ-ի, ԵՄ-ի և Ուկրաինայի արտաքին քաղաքական գերատեսչությունների ղեկավարների՝ ապրիլի 17-ին Ժնևում նշանակված բանակցությունների նախաշեմին:

Ինչպես նախօրյակին հայտարարել է Եվրամիության արտաքին գործերի և անվտանգության քաղաքականության գերագույն ներկայացուցիչ Քեթրին Էշթոնը, ԵՄ-ն ակնկալում է, որ այդ հանդիպմանը «բովանդակալից երկխոսություն կսկսվի» Ուկրաինայի ճգնաժամի կարգավորման շուրջ: Նա «խորը մտահոգություն» է հայտնել Ուկրաինայի արևելքում լարվածության աճի կապակցությամբ: Էշթոնն Ուկրաինայի ֆեդերալացման կողմնակիցների գործողությունները որակել է «զինված անձանց և անջատողական խմբերի ակտիվության պոռթկում»՝ դատապարտելով բողոքավորների կողմից «վարչական շենքերի և ներքին գործերի նախարարության բաժինների» նկատմամբ հսկողության հաստատումը:

Ավելի վաղ Էշթոնի մամուլի քարտուղարը հայտարարել է, որ Եվրամիությունը նախարարական հանդիպման նախօրեին ոչ մի որոշում չի ընդունել Ռուսաստանի նկատմամբ պատժամիջոցների ընդլայնման վերաբերյալ: