Բնակչությանը զենք չի բաժանվի, և ոչ մի քաղաքացիական պատերազմ էլ չի լինի. Տուրչինով

Ուկրաինայի նախագահի պաշտոնակատար, Գերագույն ռադայի խոսնակ Ալեքսանդր Տուրչինովը հայտարարել է, որ զենք չի բաժանի քաղաքացիական բնակչությանը, և ոչ մի քաղաքացիական պատերազմ էլ չի լինի:

Այս մասին տեղեկացնում է «Ուկրինֆորմը», նա ասել է խորհրդարանի նիստում՝ մեկնաբանելով այն օրենքի ընդունման անհրաժեշտության վերաբերյալ «Սվոբոդա» խմբակցության նախաձեռնությունը, որը քաղաքացիական անձանց թույլ է տալիս զենք ունենալ, ինչպես նաև պետության պաշտպանության համար քաղաքացիական անձանց զենք բաժանելու նախաձեռնությունը:

«Պետությունը զենք է տալիս սոսկ նրանց, ովքեր գնում են աշխատելու ոստիկանությունում կամ ովքեր գնում են ծառայելու Ազգային գվարդիայում կամ զինված ուժերում: Եթե մենք ստեղծենք զենքից ազատորեն օգտվելու հնարավորություն, դա նշանակում է, որ ազատ օգտվելու հնարավորություն կստանան նաև անջատականները, և դա նշանակում է, որ մենք Ուկրաինան մղում ենք դեպի քաղաքացիական պատերազմի անդունդ: Ուկրաինայում քաղաքացիական պատերազմ չի լինի: Վերջ»,- հայտարարել է Տուրչինիովը:

Նախագահի խոսքով՝ նրանք, ովքեր ցանկանում են Ուկրաինան պաշտպանել անջատականներից և զավթիչներից, պետք է գրանցվեն ոստիկանությունում, զինված ուժերում:

Ավելի վաղ Ռուսաստանի վարչապետ Դմիտրի Մեդվեդևը հայտարարել է, որ Ուկրաինան քաղաքացիական պատերազմի շեմին է: Այս մասին նա գրել է Facebook-ի իր էջում: