ՌԴ-ի պաշտպանության նախարարությունը կասեցրել է Ղրիմից զենքի ու ռազմական տեխնիկայի հանձնումն Ուկրաինային

ՌԴ-ի պաշտպանության նախարարությունը կասեցրել է Ղրիմից զենքի ու ռազմական տեխնիկայի հանձնումն Ուկրաինային, որպեսզի դրանք չօգտագործվեն այդ երկրի արևելքի և հարավ-արևելքի խաղաղ բնակչության դեմ: Այդ մասին տեղեկացնում է ԻՏԱՌ-ՏԱՍՍ-ը, ապրիլի 15-ին լրագրողներին հայտնել է Ռուսաստանի պաշտպանական գերատեսչության ղեկավարի տեղակալ Անատոլի Անտոնովը:

«Կցանկանայի հիշեցնել, որ ՌԴ-ն կատարում է իր միջազգային պարտավորությունները, և Փարիզյան խարտիայի շրջանակներում, Հելսինկյան ակտի, ՄԱԿ-ի ու ԵԱՀԿ-ի որոշումների շրջանակներում պարտավորություններ է ստանձնել զենք չմատակարարել թեժ կետեր կամ զսպվածություն ցուցաբերել նման մատակարարումների հարցում»,-ասել է նա:

Փոխնախարարի խոսքով՝ Ուկրաինայի արևելքն ու հարավ-արևելքը ներկայում թեժ կետ են:

Այսօր ավելի վաղ Ռուսաստանի պաշտպանության առաջին փոխնախարար բանակի գեներալ Արկադի Բախինը հայտնել է, որ ավելի քան 9 հազար ուկրաինացի զինվորականներ և քաղաքացիական անձնակազմի 7 հազար աշխատակիցներ են ընդունվել ՌԴ-ի զինված ուժեր:

«Այսօրվա դրությամբ նշված կատեգորիայի 9,2 հազար զինծառայողներ առաջնահերթ կարգով ստացել են ՌԴ-ի քաղաքացիություն, պարտավորագրով զինվորական ծառայության են ընդունվել ՌԴ-ի զինուժերում և նշանակվել զինվորական պաշտոնների»,-ասել է նա: Նրանց թվում են 2,7 հազար սպա, 1,3 հազար պրապորշչիկ և միչման, 5 հազարից ավելի զինվորներ, նավաստիներ, սերժանտներ ու ավագներ, ինչպես նաև 191 կուրսանտ:

Բացի այդ, «քաղաքացիական անձնակազմի 7 հազարից ավելի ներկայացուցիչներ աշխատանքի են ընդունվել և պաշտոնների նշանակվել ՌԴ-ի Սևծովյան նավատորմի զորամասերում և ստորաբաժանումներում:

Ուկրաինայի բանակի՝ ՌԴ-ի զինուժեր ընդունված նախկին սպաների համար ուսուցում կկազմակերպվի լրացուցիչ կրթության ծրագրերով: