«Վրաստանն ամեն ինչ կանի ՌԴ-ի հետ հարաբերությունները նորմալացնելու համար». Ղարիբաշվիլի

Վրաստանն «ամեն ինչ կանի ՌԴ-ի հետ հարաբերությունների նորմալացման գործընթացն առողջացնելու համար»: Այդ մասին լրագրողներին հայտարարել է հանրապետության վարչապետ Իրակլի Ղարիբաշվիլին:

«Այսօր Պրահայում տեղի կունենա Զուրաբ Աբաշիձեի հանդիպումը Գրիգորի Կարասինի հետ, որտեղ կքննարկվեն բազմաթիվ հարցեր»: «Կարծում եմ, որ մենք պետք է ամեն ինչ անենք ՌԴ-ի հետ հարաբերությունների նորմալացման գործընթացն առողջացնելու համար»,-նշել է վարչապետը:

ԻՏԱՌ-ՏԱՍՍ-ը հիշեցնում է, որ Աբաշիձեի և ՌԴ-ի արտաքին գործերի փոխնախարար Գրիգորի Կարասինի այսօրվա երկկողմ հանդիպումը թվով արդեն վեցերորդն է:

Պրահայի հանդիպումից առաջ Կարասինը ՌԻԱ Նովոստիին ասել է, որ Ռուսաստանի և Վրաստանի միջև երկկողմ բեռնափոխադրումների ծավալը միայն ընթացիկ տարվա երկու ամսում կազմել է անցյալ տարվա ընդհանուր ցուցանիշի գրեթե 55 տոկոսը: Այսպես, Կարասինի խոսքով՝ փոխադարձ առևտրի շրջանառությունը 2013 թվականի ընթացքում ավելացել է 33 տոկոսով, իսկ 2014 թվականի հունվար-փետրվարին 2013 թվականի համապատասխան ժամանակաշրջանի համեմատությամբ աճը կազմել է 51 տոկոս: Բացի այդ, ընթացիկ տարվա հունվարից շուրջօրյա ռեժիմով սկսել է աշխատել Վերին Լարս-Կազբեգի անցագրային կետը:

«Սկսած հունվարից՝ ռուս և վրացի սահմանապահների միջև Վերին Լարս-Կազբեգի անցակետում բացվել է կապի ուղիղ գիծ, ինչը մեծապես օգնում է ապահովելու զգալիորեն ավելացած տրանսպորտային հոսքը: Երկկողմ բեռնափոխադրումների ծավալը միայն ընթացիկ տարվա երկու ամսվա ընթացքում կազմել է ամբողջ 2013 թվականի ցուցանիշի գրեթե 55 տոկոսը: Այն ժամանակ բեռնափոխադրումները կազմել են 110,5 հազար տոննա»,-հավելել է դիվանագետը:

Կարասինի խոսքով՝ Պրահայի հանդիպմանը կողմերը քննարկելու են երկկողմ հարաբերությունների վիճակը: Ինչպես նշել է դիվանագետը, անցած 2013 թվականը բավականին արդյունավետ էր, ՌԴ-ի և Վրաստանի միջև հարաբերությունների բոլոր բարդություններով հանդերձ, դրականը քիչ չի եղել, ամենակարևորն այն է, որ փոխգործակցությունը վերընթաց է զարգանում հենց այն բնագավառներում, որտեղ այն հնարավոր է դիվանագիտական հարաբերությունների բարակայության պայմաններում: