Եվրախորհրդարանը կոչ է արել նոր պատժամիջոցներ պատրաստել Ռուսաստանի դեմ

Եվրախորհրդարանի պատգամավորներն այն կարծիքին են, որ Ուկրաինայի ճգնաժամի հաղթահարման համար Ռուսաստանի իշխանությունները պետք է երկոսության մեջ մտնեն Կիևի գործող կառավարության հետ: Այս մասին ասված է ԵԽ-ի բանաձևում, որին պատգամավորները հավանություն են տվել Ստրասբուրգում կայացած լիագումար նստաշրջանում: Եվրախորհրդարանը հույս է հայտնել, որ այդ բանավեճի արդյունքում կհաջողվի ուղի հարթել դեպի համապարփակ և երկարատև դիվանագիտական լուծումը»:

Պատգամավորները նաև հայտարարել են, որ «ընթացիկ իրադրությունը պահանջում է, որ Եվրամիության խորհուրդն ուժեղացնի պատժամիջոցների երկրորդ փուլը և պատրաստ լինի երրորդ փուլի գործարկմանը», ինչպես նաև «անհապաղ կիրառի զենքի և կրկնակի նշանակության տեխնոլոգիաների մատակարարումների բռնարգելքը»:

Դրա հետ մեկտեղ ԵԽ-ն «սկզբունքորեն» ողջունել է «Ուկրաինայի ապագա կարգավիճակի և տարածքային կառուցվածքի շուրջը համազգային հանրաքվեի անցկացման գաղափարը»:

ԵԽ-ի պատգամավորները վստահություն են հայտնել, որ Եվրոպայի խորհրդի խորհրդարանական վեհաժողովում մինչև տարեվերջ ձայնի իրավունքից ՌԴ-ի պատվիրակության զրկումը և ՄԱԿ-ի Գլխավոր ասամբլեայի բանաձևը, որը դատապարտում է Ղրիմի միացումը, «միջազգային ասպարեզում Ռուսաստանի Դաշնության աճող մեկուսացման պարզորոշ ազդանշաններ են», հաղորդել է ԻՏԱՌ-ՏԱՍՍ-ը: