Հարավային Կորեայում ձերբակալվել է խորտակված լաստանավի անձնակազմի ևս չորս անդամ

Օրերս Հարավային Կորեայում խորտակված «Սևոլ» լաստանավի անձնակազմի ևս չորս անդամներ են ձերբակալվել անփութության կասկածանքով: Ապրիլի 21-ին հաղորդել է հարավկորեական YTN հեռուստաալիքը:

Ըստ քննիչների վարկածի, ձերբակալվածները լաստանավը լքել են՝ հարկ եղած ձևով չկազմակերպելով ուղևորների տարհանումը:

Ավելի վաղ ձերբակալվել էին նավապետ Լի Չժուն Սոկը և անձնակազմի ևս երկու անդամ:

Ինչպես այսօր հաղորդել է «Ռյոնհապ» գործակալությունը, «Սևոլ» լաստանավի՝ հետաքննության մեջ գտնվող ինժեները, ցանկացել է ինքնասպանությամբ վերջ տալ կյանքին:

Սոն ազգանվամբ ինժեները փորձել է իրեն կախել Մոկպո քաղաքի մոթելներից մեկում, որտեղ «Սևոլի» անձնակազմի փրկված անդամները հետաքննչական ստուգում էին անցնում: Նախօրյակին 57-ամյա ինժեներին հարցաքննել են մինչև ուշ գիշեր, իսկ ապրիլի 21-ին հարցաքննությունը պետք է շարունակվեր: Մոթելի աշխատակիցները Սոնին հայտնաբերել են ապրիլի 21-ին տեղական ժամանակով ժամը 11:40-ին և շտապ օգնություն են կանչել. այժմ նրա կյանքին վտանգ չի սպառնում:

Հարավային Կորեայի նախագահ Պակ Կին Հեն խիստ քննադատության է ենթարկել խորտակված լաստանավի նավապետի և անձնակազմի առանձին անդամների գործողությունները: Նշելով, որ նրանք առաջինների թվում են լքել նավը և առանց օգնության թողել հարյուրավոր ուղևորների, պետության ղեկավարը նրանց գործողությունները հավասարեցրել է սպանությանը:

«Նավապետի և անձնակազմի առանձին անդամների գործելակերպն անըմբռնելի է ողջամտության տեսանկյունից և դա նման է սպանության ակտի, ինչն անկարելի է թույլ տալ»,- հայտարարել է Պակ Կին Հեն: Նա նաև խոստացել է բացահայտել լաստանավի շահագործման բոլոր խախտումները և «քրեական ու քաղաքացիական պատասխանատվության» ենթարկել բոլոր մեղավորներին՝ անկախ նրանց զբաղեցրած պաշտոնից:

Դատախազության ու ոստիկանության կողմից համատեղ ստեղծված հետաքննչական խմբի նախնական հետաքննության արդյունքում պարզվել է, որ աղետի պահին նավը վարում էր ոչ թե նավապետը, այլ՝ նրա երրորդ օգնականը:

Ինչ վերաբերում է նավի խորտակմանը, ապա այն կարող էր կապված լինել լաստանավի ուղղության կտրուկ փոփոխման հետ, ինչը հանգեցրել է բեռների տեղաշարժին: Իշխանությունները մտադիր են պատահածի հանգամանալի հետաքննություն անցկացնել, որպեսզի ապագայում բացառեն նման ողբերգությունների կրկնվելը:

Ըստ վերջին տվյալների՝ հարավկորեական «Սևոլ» լաստանավի խորտակման հետևանքով զոհվածների թիվը հասել է 64-ի: Գործնականում այլևս չկան հույսեր, որ մինչ այժմ չգտնված 302 ուղևորներից ու անձնակազմի անդամներից որևէ մեկին կհաջողվի ողջ գտնել: Փրկվել է 174 մարդ, ներառյալ նավապետը և անձնակազմի հիմնական մասը:

Որոնողա-փրկարարական գործողությանը մասնակցում է 212 նավ ու կատեր, այդ թվում՝ առափնյա պահպանության ծառայության 90 նավ, երկրի ռազմածովային ուժերի 32 նավ, 34 ինքնաթիռ և ուղղաթիռ, ինչպես նաև 556 փրկարար, հաղորդել է «Ինտերֆաքսը»: