ԵԱՀԿ ներկայացուցիչներն այցելել են Սլավյանսկ

ԵԱՀԿ մոնիթորինգային առաքելության ներկայացուցիչները կարողացել են հայտնվել Դոնեցկի մարզի Սլավյանսկ քաղաքում: Այնտեղ նրանք շփվել են իշխանությունների և տեղի բնակիչների հետ: Առաքելության ներկայացուցիչները հանդիպել են նաև Սլավյանսկի քաղաքապետի հետ: Այս մասին հայտնում է itar-tass-ը՝ վկայակոչելով Գերմանական Deutsche Welle հեռուստառադիոընկերությանը:

ԵԱՀԿ առաքելությունը հետաքննություն է սկսել նաև Սլավյանսկում արձանագրված փոխհրաձգության կապակցությամբ:

«ԵԱՀԿ մոնիթորինգի ներկայացուցիչներն առաջին անգամ են Սլավյանսկում՝ ճգնաժամի սկսվելուց ի վեր: Նրանք հանդիպել են քաղաքապետի հետ և հետաքննություն են սկսել Սլավյանսկում արձանագրված փոխհրաձգության կապակցությամբ»,- ասվում է հաղորդագրությունում:

Նշենք, որ ԵԱՀԿ-ն որոշել է իր ներկայացուցչին Ուկրաինայի հարավ-արևելյան շրջաններ գործուղել' Ժնևում տեղի ունեցած քառակողմ հանդիպման արդյունքում, որտեղ Ուկրաինան, Ռուսաստանը, ԱՄՆ-ն և ԵՄ-ն ստորագրել են բանաձև' Ուկրաինայում ճգնաժամի սրման անթույլատրելիության մասին: Ենթադրվում է, որ դիտորդը պետք է հետևի ժնևյան պայմանավորվածությունների կատարման ընթացքին: