Կիևը հայտարարել է Ուկրաինայի արևելյան մարզերում «հակաահաբեկչական գործողության» վերսկսման մասին

Ուկրաինայի արևելյան մարզերում վերսկսվել է հակաահաբեկչական գործողության ակտիվ փուլը: Այդ մասին հայտարարել է հանրապետության առաջին փոխվարչապետ Վիտալի Յարեման:

Ապրիլի 22-ին հայտնի է դարձել, որ Ուկրաինայի նախագահի պաշտոնակատար Ալեքսանդր Տուրչինովը պահանջել է հանրապետության արևելքում վերսկսել հատուկ գործողությունը:

«Նախագահի պաշտոնակատարի կարգադրությանը համապատասխան՝ հակաահաբեկչական գործողությունը շարունակվում է: Զատկի տոնին դրա ակտիվ փուլը կասեցվել էր, բայց այսօրվանից ակտիվ փուլը շարունակվում է: Իրավապահ մարմիններն աշխատում են վերացնել բոլոր այն կազմավորումները, որոնք ներկայում գործում են Կրամատորսկում, Սլավյանսկում և Դոնեցկի ու Լուգանսկի մարզերի այլ քաղաքներում»,- ապրիլի 23-ին ասել է նա լրագրողներին Կիևում:

Դրա հետ մեկտեղ, ինչպես նշում է «Ինտերֆաքսը», Յարեման հայտնել է, որ այս գիշեր իրավապահներն ակտիվ գործողություններ չեն ձեռնարկել:

Մինչ այդ Կիևի իշխանությունները հայտարարել են երկրի արևմուտքում և արևելքում ուկրաինացիների օրինական քաղաքական պահանջները լսելու և նրանց ընդառաջելու պատրաստակամության մասին: «Ուկրաինայի իշխանությունը պատրաստ է լսել արևմուտքում և արևելքում ուկրաինացիների օրինական քաղաքական պահանջները: Եվ ոչ միայն լսել, այլև ընդառաջել նրանց: Եվ մենք կոչ ենք անում կատարել Ժնևյան համաձայնությունները, որոնք կնքվել են Ուկրաինայի, Ռուսաստանի, ԱՄՆ-ի և Եվրամիության միջև»,- ասված է հայտարարության մեջ:

Ուկրաինայի կառավարությունը հայտնել է, որ սկսել է կատարել պայմանավորվածությունների իր մասը: Այսպես, կասեցվել է երկրում հատուկ գործողությունների ակտիվ փուլը: Բացի այդ նախաձեռնվել է սահմանադրական բարեփոխման անցկացումը, իսկ Գերագույն ռադա օրինագիծ է մտցվել ցուցարարների համաներման մասին: Դրա հետ մեկտեղ կառավարությունը «երաշխավորում է ռուսաց լեզվի պաշտպանությունը և նրա հատուկ կարգավիճակի ամրագրումը»,- նշվում է հաղորդագրության մեջ:

«Խորհրդարանական կոալիցիան դիմել է բոլոր քաղաքական ուժերին՝ կոչ անելով փոխըմբռնման հուշագիր ստորագրել Ուկրաինայի արևելքում իրադրության կարգավորման համար»,- հավելել է նախարարների կաբինետը: