Պուտինը ցանկանում է վերականգնել Սովետական միությունը. Յացենյուկ

Ուկրաինայի վարչապետ Արսենի Յացենուկը հայտարարել է, որ կարճաժամկետ հեռանկարում Ուկրաինայում ՆԱՏՕ-ի անդամ չի կարող դառնալ, բայց նշել է, որ դաշինքը միակ տարբերակն է՝ Ուկրաինան պաշտպանելու համար: Այս մասին հայտնել է BBC-ի գործակալության ռուսական ծառայությունը:

«ՆԱՏՕ-ն Ուկրաինան պաշտպանելու միակ միջոցն է: Կարճաժամկետ հեռանկարում ՆԱՏՕ-ն պատրաստ չէ ընդունել Ուկրաինային, բայց ինչպես ասվում է Աստվածաշնչում, «եթե թակես դուռը, այն կբացվի»: Մենք որոշեցինք թակել այն»,- ասել է վարչապետը Կիևում կայացած YES ֆորումի շրջանակներում:

Յացենուկը նշել է նաև, որ Ռուսաստանի հետ երկկողմ բանակցություններն արդյունավետ չեն լինի՝ Դոնբասի հակամարտությունը լուծելու համար:

«Ես Ժնևյան բանակցությունների ձևաչափի կողմնակիցն եմ՝ Միացյալ Նահանգների, Եվրամիության, Ուկրաինայի և Ռուսաստանի մասնակցությամբ: Մենք այնքան ուժեղ չենք, որ երկկողմ բանակցություններ վարենք: Պուտինը ձգտում է սառեցված հակամարտության»,- ասել է վարչապետը:

Յացենյուկը կարծիք է հայտնել, որ Պուտինի վերջնական նպատակն Ուկրաինան՝ որպես անկախ պետություն, ոչնչացնելն է: 

«Ինձ հայտնի է նրա վերջնական նպատակը: Նա ոչ միայն ուզում է վերցնել Դոնեցկն ու Լուգանսկը. նրա նպատակը ողջ Ուկրաինան է: Պուտինը չի կարող համաձայնել այն մտքին, որ Ուկրաինան դառնա եվրոպական ընտանիքի անդամ. նա ցանկանում է վերականգնել Սովետական միությունը»,- ասել է Յացենյուկը՝ հավելելով, որ առաջին փուլը եղել է Ղրիմի «գրավումը», երկրորդը՝ Դոնբասում սառած հակամարտության վերականգնումը, իսկ երրորդը՝ Օդեսայի միջոցով միջանցքը Պրիդնեստրովյե: