«Ժողովուրդ». Սերժ Սարգսյանը փոխվարչապետի և ԱԱԽՔ-ի պաշտոնները «բրոնյա» է արել

ՀՀԿ մամուլի խոսնակ Էդուարդ Շարմազանովը կուսակցության ԳՄ երեկվա նիստից հետո պատասխանելով փոխվարչապետի թափուր պաշտոնում նշանակման վերաբերյալ հարցին' ասել է.«Մի՛ շտապեք, երբ ժամանակը գա, փոխվարչապետի հարցը կքննարկվի ու կնշանակվի, բայց այս պահին փոխվարչապետի նշանակման հարցը չի քննարկվել»: Գրում է «Ժողովուրդ»-ը:

Հիշեցնենք, որ բացի փոխվարչապետի պաշտոնից, որը Արմեն Գևորգյանի հրաժարականից հետո մեկուկես ամիս է'թափուր է մնացել, արդեն յոթ ամիս է' թափուր է նաև Ազգային անվտանգության խորհրդի քարտուղարի պաշտոնը: Առայժմ կատարված չեն նաև նորաստեղծ երկու նախարարությունների ղեկավարների նշանակումները, թեև Սերժ Սարգսյանը մի քանի օր առաջ արդեն իսկ ստորագրել է «ՀՀ Կառավարության կառուցվածքային մասին» փոփոխված օրենքը: Եվ այսքանից հետո առաջիկա նշանակումների շուրջ լրագրողների հարցերին ի պատասխան՝ ՀՀԿ ԳՄ նիստից-նիստ Է. Շարմազանովը պատասխանում է, թե այդ հարցերը չեն քննարկվել, և որ շտապելու հարկ չկա:

Իշխող կուսակցության նման մոտեցումն արտառոց է և տարբեր եզրակացությունների տեղիք տվող: Նախ' իշխանական վերնախվում երբևէ չի եղել նման բան, որ, օրինակ, փոխվարչապետի պաշտոնն այսքան երկար ժամանակ թափուր մնա (թեև Սահմանադրությամբ ժամկետ սահմանված չէ): Այս պաշտոնն այնքան բաղձալի և կարևոր է եղել, որ, օրինակ, գործող վարչապետ Հովիկ Աբրահամյանը այն «իրենով էր արել» անգամ մինչ 2005թ., երբ Սահմանադրությամբ նման պաշտոն նախատեսված չէր: Հետագայում Արմեն Գևորգյանի' այս պաշտոնում նշանակումը ևս շատ կարևոր նշանակություն ուներ, և, ըստ էության, հանդիսանում էր Ռոբերտ Քոչարյան-Սերժ Սարգսյան գլոբալ պայմանավորվածության ամրագրումը: Եվ հիմա նման առանցքային հաստիքը տևական ժամանակ թափուր պահելը, բնականաբար, չի կարող հենց այնպես լինել: Այնպիսի տպավորություն է, որ Սերժ Սարգսյանն այս և նշված մյուս պաշտոններն առայժմ «բրոնյա արած» է պահում' հետագայում դրանք ինչ-ինչ նպատակներով օգտագործելու համար:

Շարունակությունը՝ թերթի այսօրվա համարում: