Քառյակի «12 կետերի» շուրջ ՀՀԿ-ն և ԲՀԿ-ն քննարկման անհրաժեշտություն են տեսնում

Ոչ իշխանական քառյակի առաջարկած «12 կետերի» վերաբերյալ քննարկումները պետք է անցկացնել կլոր սեղանի շուրջ: Լրագրողների հետ հանդիպման ժամանակ նման տեսակետ արտահայտեց Հայաստանի հանրապետական կուսակցության պատգամավոր Սուքիաս Ավետիսյանը: Նա վստահեցրեց, որ միայն մասնագետների և բոլոր քաղաքական ուժերի ներկայացուցիչների հետ անցկացված մանրամասն քննարկումների արդյունքում կարելի է գալ ընդհանուր հայտարարի: «Առաջին անգամ չէ, որ իշխանությունն առաջարկում է քննարկել այդ հարցերը ցանկացած ձևաչափով: Սակայն արտահերթ նիստի ժամանակ բուն հարցեր քննարկելը ճիշտ չէ, պետք է հարցերը քննարկվեն հետո նոր բերվեն արտահերթ»,- «Արմենպրես»-ի հաղորդմամբ' ասաց Ավետիսյանը:

«Բարգավաճ Հայաստան» կուսակցության անդամ, պատգամավոր Միքայել Մելքումյանը ևս դեմ չէ քննարկումներին, սակայն համոզված է, որ կա արտահերթ նիստի անհրաժեշտություն, որի ժամանակ ընդդիմադիր ուժերը բարձրացնելու են համամասնական ընտրության ձևի անցնելու հարցը: «Համամասնականին այլընտրանք չկա, և եթե մենք նստենք և խոսենք իշխանական ուժի հետ, ապա կապացուցենք դա: Քաղաքական գործընթացները ճոճանակի նման են, և եթե նախկինում մենք մեծամասնականի կողմում էինք, ապա հիմա կարող ենք անցնել համամասնականի կողմ: Սակայն կրկնում եմ, որ 12 կետերն անբաժանելի են և դրանք պետք է իրականացվեն»,- ասաց նա:

Խորհրդարանական երեք ուժերը' «Ժառանգությունը», Հայ ազգային կոնգրեսն ու «Բարգավաճ Հայաստան» կուսակցությունը, հայտարարել են, որ հանրահավաքային պայքար են սկսել: Նրանք արդեն երկու հանրահավաք են արել (հոկտեմբերի 10-ին և 24-ին), սակայն դեռևս միասնական օրակարգ չունեն: ՀՅ Դաշնակցությունը, որն ավելի վաղ որոշ հարցերի շուրջ համագործակցում էր երեք ուժերի հետ և միացել էր «12 կետանոց փաստաթղթին»' լքեց քառյակը' ընդգծելով, որ կողմ է Սահմանադրական բարեփոխումներին և չի կարող հարթակում գտնվել այն ժամանակ, երբ մյուս ուժերը դեմ են արտահայտվում այդ բարեփոխումներին: