Ադրբեջանում զանգվածային կրճատումները հասել են պետական կառույցներ

Ադրբեջանի պետական հաստատություններում զանգվածային կրճատումները նոր թափ են ստանում: Եթե մինչ այժմ զանգվածային կրճատումներ են արվում Բաքվի մետրոպոլիտենում, «Ազերէներժի»-ում և Ադրբեջանի պետական նավթային ընկերությունում (SOCAR), ապա այժմ ադրբեջանական կառավարությունը որոշում է ընդունել ևս մի քանի պետական կառույցներում կրճատումներ կատարելու մասին:

Ինչպես հաղորդում է «Արմենպրես»-ը, «Ազադլիգ»-ին հասած հավաստի տեղեկություններով, մոտ ժամանակում կկրճատվի նաև «Ազերսու» և «Ադրբեջանի ծովային նավագնացություն» ՓԲԸ-ների աշխատակիցների 30 տոկոսը:

Նշվում է, որ Ադրբեջանի պետական հաստատություններում կրճատումները դրանով չեն սահմանափակվելու, և որ ամենամեծ կրճատումներն առաջիկա երկու ամիսներին կյանքի կկոչվեն Բաքվի գործադիր իշխանությանը կից շինարարական հաստատություններում:

Նաև նշվում է, որ խոշոր կրճատումներ են սպասվում Ադրբեջանի փախստականների և հարկադիր վերաբնակների հետ աշխատանքի գծով պետական կոմիտեում: Պետական բյուջեից այդ կառույցին հատկացվող ֆինանսական միջոցներն արդեն կիսով չափ նվազեցվել են: Մնացածն էլ հատկացվել է ավարտին մոտեցող գործերը վերջացնելու համար: Իսկ նոր նախագծերի համար ֆինանսական միջոցներ չեն նախատեսվել: Այդ պատճառով կառույցը հարկադրված է դիմել խոշոր կրճատումների:

«Ազադլիգ»-ն ընդգծում է, որ կրճատումները կապված են նավթի գնի էժանացման հետ, և հեգնանքով հիշեցնում. «Իսկ Ադրբեջանի առաջնորդ Իլհամ Ալիևը հայտարարում էր, որ նավթի էժանացումը Ադրբեջանի վրա ոչ մի ազդեցություն չի գործելու...»:

Նավթի համաշխարհային գների անկման հետ կապված՝ Ադրբեջանում ունեցած իր ընկերություններում արդեն զանգվածային կրճատումներ է անցկացրել նաև BP Azerbaijan ընկերությունը: Ադրբեջանի «Արևելք-Արևմուտք» հետազոտական կենտրոնի տնօրեն, քաղաքագետ Արաստուն Օրուջլուն որոշ ժամանակ առաջ հայտարարել է, որ նավթի գների անկման պատճառով Ադրբեջանում կկրճատվեն անգամ չնչին սոցիալական ծրագրերը:

Ադրբեջանի 1915 թվականի պետբյուջեում նավթի գինը մեկ բարելի համար նախատեսված է 90 դոլար: Ներկայում այն արդեն պետբյուջեում նախատեսվածից 36 դոլարով ցածր է: