«Հունաստանը և Կիպրոսը կարող են «կամուրջ» դառնալ ՌԴ-ի և ԵՄ-ի համագործակցության համար». Ցիպրաս

Հունաստանի խորհրդարանական ընտրություններում հաղթանակ տարած ՍԻՐԻԶԱ կուսակցության առաջնորդ և երկրի նոր վարչապետ Ալեքսիս Ցիպրասը հայտարարել է, որ Աթենքը և Կիպրոսը «կարող են կամուրջ դառնալ Եվրոպայի և Ռուսաստանի համագործակցության համար»:

Ինչպես հաղորդում է «Արմենպրես»-ը՝ հղում անելով «Բլումբերգ» գործակալությանը, այս հայտարարությունը Ցիպրասն արել է Կիպրոսի նախագահ Նիկոս Անաստասիադիսի հետ փետրվարի 2-ին կայացած հանդիպումից հետո: Բացի այդ, Հունաստանի նոր վարչապետն ասել է, թե Աթենքը «չի քննարկում Ռուսաստանից վարկ վերցնելու հնարավորությունը»:

ՌԻԱ Նովոստին հիշեցնում է, որ նախօրյակին Եվրախորհրդարանի նախագահ Մարտին Շուլցն անհանգստություն է հայտնել այն բանի կապակցությամբ, որ Ալեքսիս Ցիպրասի գլխավորած Հունաստանի նոր կառավարությունը ձգտում է համագործակցել Ռուսաստանի հետ:

Ավելի վաղ Handelsblatt գերմանական հրատարակությունը՝ հղում անելով կառավարական աղբյուրների, գրել է, որ Եվրահանձնաժողովի ղեկավար Ժան-Կլոդ Յունկերը պատրաստվում է լուծարել Հունաստանի միջազգային վարկատուների «եռյակը» (Եվրահանձնաժողով, Եվրոպայի կենտրոնական բանկ, Արժույթի միջազգային հիմնադրամ): Յունկերը, հրատարակության տեղեկատվության համաձայն, մտադիր է շտապ կարգով գտնել «եռյակի» այլընտրանք, որին դեմ է Հունաստանի նոր վարչապետ Ալեքս Ցիպրասը: «Եռյակի» բարենորոգմանը և Աթենքի համար ստորացուցիչ տեսչական ստուգումներից հրաժարվել ուն համաձայն է նաև Գերմանիայի կառավարությունը:

Խիստ սահմանափակումների փոխարեն Հունաստանին կարող են առաջադրվել ավելի ընդհանուր տնտեսական նպատակներ: Սակայն Եվրահանձնաժողովն այդ քայլին կգնա միայն այն բանից հետո, երբ Հունաստանի իշխանությունները կհավաստեն հավատարմությունը բարեփոխումների և խնայողության քաղաքականությանը, նշում է Handelsblatt-ը: