Դեսպան Ալեքսան Հարությունյանն առանձնազրույց է ունեցել Արգենտինայի փոխնախագահի հետ

Արգենտինայում ՀՀ նորանշանակ դեսպան Ալեքսան Հարությունյանը փետրվարի 3-ին Արգենտինյան Հանրապետության նախագահական պալատում իր հավատարմագրերն է հանձնել Արգենտինայի փոխնախագահ, Սենատի նախագահ Ամադո Բուդուին: Ինչպես տեղեկացնում են ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, հավատարմագրերի հանձնման պաշտոնական արարողությանը հաջորդել է Արգենտինայի փոխնախագահ Ամադո Բուդուի և դեսպան Հարությունյանի առանձնազրույցը:

Շնորհավորելով և ողջունելով դեսպանին' փոխնախագահ Բուդուն հույս է հայտնել, որ վերջինս լավագույնս կնպաստի հայ-արգենտինական' երկկողմ բարձր մակարդակի հարաբերությունների ամրապնդմանն ու զարգացմանը: Արգենտինայի փոխնախագահը բարձր է գնահատել 2014թ. հուլիսի 7-8-ը ՀՀ Նախագահ Սերժ Սարգսյանի' Արգենտինա կատարած պաշտոնական այցը և կարևորել է այցի ընթացքում ձեռք բերված բարձր մակարդակի պայմանավորվածություններն ու գրանցված արդյունքները: Ամադո Բուդուն անդրադարձել է նաև արգենտինահայ համայնքին՝ կարևորելով վերջինիս ազդեցիկ դերակատարությունը երկրի հասարակական-քաղաքական կյանքում: Արգենտինայի փոխնախագահը պատրաստակամություն է հայտնել իր նպաստը բերել հայ-արգենտինական հարաբերությունների բազմակողմանի զարգացմանը:

Դեսպան Հարությունյանն իր հերթին նշել է, որ իր պաշտոնավարման ընթացքում կանի առավելագույնը' երկու բարեկամ պետությունների միջև կապերն էլ ավելի սերտացնելու և ամրապնդելու համար:

Նախագահական պալատում տեղի ունեցած արարողությունից հետո դեսպանն այցելել է Արգենտինայի ազգային հերոս, գեներալ Սան Մարտինի անվան հրապարակ, որտեղ ծաղկեպսակ է զետեղել գեներալ Սան Մարտինի հուշարձանին: