Իշխան Զաքարյանը Երևանում է

Փետրվարի 4-ին ԱԺ-ում տեղի ունեցավ ՀՀ Վերահսկիչ պալատի 2013թ. տարեկան հաշվետվության քննարկումը, որի ժամանակ, սակայն, որոշ քաղաքական շրջանակների և լրատվամիջոցների ավելի շատ հետաքրքրում էր ոչ թե հաշվետվության բովանդակությունը, այլ ՎՊ նախագահ Իշխան Զաքարյանի գտնվելու վայրը:

Այսօր՝ փետրվարի 6-ին, «Ժամանակ» օրաթերթը գրել էր, թե «իրենց տեղեկություններով՝ Իշխան Զաքարյանն այս օրերին իր հանգիստն է անցկացնում Հորադիզում և զվարճանում է՝ որս անելով»: Ըստ թերթի՝ «այս լուրը երեկ լրատվամիջոցների հարցումներին ի պատասխան՝ մասամբ հաստատել էր ՎՊ մամուլի ծառայությունը՝ ասելով, թե Իշխան Զաքարյանը փետրվարի 2-ից 15 օրով արձակուրդում է»:

Այս կապակցությամբ Lurer.com-ը զրուցել է ՎՊ մամուլի քարտուղար Արամ Ալավերդյանի հետ, ով, ի պատասխան, նշեց հետևյալը. «Ես ինքս էլ տևական ժամանակ աշխատել եմ լրատվական դաշտում և ցավում եմ նման ցածրարժեք լրագրողական «տրյուկեր» կիրառողների համար: Ես ընդամենն ասել եմ, որ պարոն Զաքարյանը գտնվում է արձակուրդում և նույնիսկ ցանկացողներին տրամադրել դա հավաստող հրամանի պատճենը: Սա ուղղակի անհեթեթություն է, և սովորաբար նման լուրերին անիմաստ ենք համարում նույնիսկ անդրադառնալը: Միայն կասեմ, որ պարոն Զաքարյանը Երևանում է, և իմ ունեցած հավաստի տեղեկություններով՝ առողջական խնդիրների պատճառով որոշակի բուժման կուրսեր է անցնում»: