ՀՀ քաղաքացին պաշտպանված չէ սեփական երկրում. ԱԴ

Ազատ դեմոկրատներ կուսակցությունը դատապարտում է Արտակ Խաչատրյանի նկատմամբ իրականացված բռնությունը: Այս մասին կուսակցությունը հայտարարություն է տարածել, որում, մասնավորապես, ասված է.

«Ազատ դեմոկրատներ կուսակցությունը խստորեն դատապարտում է «Կասեցում» քաղաքացիական նախաձեռնության անդամ Արտակ Խաչատրյանի առևանգումն ու նրա նկատմամբ իրականացված բռնությունը:

Չափազանց մտահոգիչ է այն հանգամանքը, որ վերջին շրջանում ՀՀ քաղաքացիները իրենց հասրակական-քաղաքական գործունեության համար բռնությունների են ենթարկվում: Ցավալիորեն պետք է նշենք, որ ՀՀ քաղաքացին պաշտպանված չէ սեփական երկրում և ակնհայտորեն ոտնահարվում են քաղաքացիների սահմանադրորեն ամրագրված իրավունքները: Նման արատավոր դեպքերի չբացահայտվածությունն անպատժելիության մթնոլորտ է ստեղծում և դառնում դրանց կրկնության պատճառ:

Իշխանությունները պարտավոր են անհապաղ բացահայտելու և պատժելու մեղավորներին, այլապես ողջ պատասխանատվությունը մնում է հենց իշխանությունների վրա»: