Ֆրանսիան վերահաստատել է ԼՂ հակամարտությունը միջնորդական ջանքերով կարգավորելու իր հանձնառությունը

Լեռնային Ղարաբաղի հակամարտությունը չպետք է ընդունել որպես հավերժ շարունակվելիք և անհաղթահարելի ինչ-որ բան: Ինչպես հաղորդում է «Արմենպրես»-ը, այս մասին ադրբեջանական «Թրենդ» գործակալության հետ զրույցում ասել է Ադրբեջանում Ֆրանսիայի դեսպան Պասկալ Մոնյեն:

«Ֆրանսերենում նման խոսք կա. գործելու համար հույսը հարկավոր չէ: Ես և իմ կառավարությունը կարծում ենք, որ Ուկրաինայի կոնֆլիկտը չի կարելի կապել ղարաբաղյան հակամարտության հետ: Եթե ուկրաինական հակամարտությունը շարունակվում է, դա չի նշանակում, որ մենք պետք է պասիվ լինենք Լեռնային Ղարաբաղի հիմնախնդրի հարցում»,- ասել է դիվանագետը: Նա ընդգծել է, որ ԵԱՀԿ Մինսկի խմբի համանախագահները տարածաշրջան կայցելեն այն ժամանակ, երբ համաձայնության գան կողմերի հետ: «Մենք տեսնում ենք ցանկություն և մտադիր ենք օգնել կողմերին հասնել երկխոսության»,- ասել է դեսպանը:

Նա նշել է, որ միջնորդությունը ո’չ տրիբունալ է, ո’չ էլ դատարան, այլ պարզապես հնարավորություն է օգտագործելու դիվանագետների և փորձագետների տեխնիկան կողմերի միջև վստահության մթնոլորտ ստեղծելու համար' հանուն հակամարտության կարգավորման:

Հիշեցնելով նախորդ տարի Ֆրանսիայի նախագահի միջնորդությամբ կայանած նախագահների հանդիպումը' Մոնյեն փաստել է, որ իրենք հնարավոր ամեն ձևով երկու երկրի նախագահներին հորդորում են սկսել երկխոսություն և խուսափել այնպիսի գործողություններից, որոնք բացասաբար են ազդում երկխոսության վրա:

«Մենք գիտենք, որ կա հակամարտության կարգավորման երեք հիմնական սկզբունք. ուժի չկիրառումը, տարածքային ամբողջականությունն ու ժողովուրդների ինքնորոշման իրավունքը: Երբեմն վերջին երկու սկզբունքները հակասում են իրար, սակայն մենք պետք է գտնենք այնպիսի սինթեզ, որը կբավարարի Հայաստանի և Ադրբեջանի պահանջները»,- ասել է Ադրբեջանում Ֆրանսիայի դեսպանը: