ԱՄՆ-ում հայտարարվել են Grammy մրցանակի դափնեկիրները

Լոս Անջելեսում հայտարարվել են երաժշտության աշխարհի ամենահեղինակավոր մրցանակի՝ Grammy-ի (Grammy Awards) դափնեկիրները «Տարվա երգը», «Տարվա ձայնագրությունը» և «Տարվա լավագույն ալբոմն» անվանակարգերում: Պարգևները հանձնվել են 57-րդ արարողության ժամանակ, տեղեկացնում է «Արմենպրես»-ը:

«Տարվա երգը» և «Տարվա ձայնագրությունը» կատեգորիաներում պարգևն ստացել է բրիտանացի Սեմ Սմիթը, նրան հաղթանակ է բերել "Stay with Me" կոմպոզիցիան: Սմիթը նաև այս արարողության ժամանակ ճանաչվել է «Լավագույն նոր կատարողը»: Այսպիսով նա արդեն դարձել է անվանակարգերի այսպես կոչված այն «մեծ քառյակի» երեք պարգևների դափնեկիրը, որոնք ամենահեղինակավորներն են համարվում մրցույթում: Դրանք են՝ «Տարվա ձայնագրությունը», «Տարվա ալբոմը», «Տարվա երգը» և «Լավագույն նոր կատարողը»: «Տարվա լավագույն ալբոմ» է ճանաչվել ամերիկացի երգիչ և կոմպոզիտոր Բեքի (Հենսենի) "Morning Phase" ձայնապնակը: Այս կատեգորիայում նրա մրցակիցն է եղել նույնպես Սմիթը:

Ինչպես նշում է ՏԱՍՍ-ը, երեկույթի մասնակիցների առջև տեսաուղերձով հանդես է եկել ԱՄՆ-ի նախագահ Բարաք Օբաման: Դրանում Միացյալ Նահանգների ղեկավարը կոչ է արել մշակույթի գործիչներին՝ միանալ կանանց նկատմամբ բռնությունների դադարեցմանն ուղղված արշավին:

«Ձեզ հետ միասին մենք կարող ենք բարելավել մեր մշակույթը՝ վերջ դնելով կանանց նկատմամբ բռնությանը: Յուրաքանչյուր չորրորդ ամերիկուհին բռնության օբյեկտ է դառնում իր տանը»,- նշել է Օբաման, որի ելույթը հաջորդել է Մադոննայի շոուին: