Մյունխենում Ալիևը խուսափել է պատասխանել ԼՂ վերաբերյալ հայ դիվանագետի ու փորձագետի ուղիղ հարցերին

Մյունխենի անվտանգության հարցերով համաժողովի «Ուկրաինայից անդին. Չկարգավորված համակարտությունները Եվրոպայում» հատվածում ունեցած ելույթից հետո Ադրբեջանի նախագահ Իլհամ Ալիևը խուսափել է Լեռնային Ղարաբաղի խնդրի կարգավորման վերաբերյալ հայկական կողմի ներկայացուցիչների հնչեցրած հարցերի ուղիղ պատասխանն երից:

Ինչպես հաղորդում է «Արմենպրես»-ը, հայկական պատվիրակության անդամ Անդրանիկ Հովհաննիսյանի այն հարցին, թե Ադրբեջանն ընդունում է, արդյոք, Մադրիդյան փաստաթղթի Հիմնարար երեք սկզբունքները' ուժի և ուժի սպառնալիքի չկիրառման, ինքնորոշման իրավունքի և տարածքային ամբողջականության մասին, ինչը ԵԱՀԿ Մինսկի խմբի համանախագահները բազմիցս երկու կողմերին կոչ են արել ընդունել, Ալիևը շփոթվել է հարցի ուղիղ ձևակերպումից և ԼՂ կարգավորման միջազգային իրավունքի հիմնարար սկզբունք հանդիսացող ժողովուրդների ինքնորոշման իրավունքը ներկայացրել միջազգային հանրությանն արդեն հոգնեցրած խեղաթյուրված կերպ' այդպես էլ չնշելով' ի վերջո այդ սկզբունքներն անվերապահորեն ընդունում է, թե՞ ոչ:

Ալիևին նեղ վիճակի մեջ է դրել նաև ԼՂ համակարտության խաղաղ կարգավորման հանձնառություններին Ադրբեջանի հավատարիմ մնալու մասին ԵԱՀԿ Մինսկի խմբի համանխագահների մի քանի օր առաջ արած հայտարարության վերաբերյալ ՀՀ ԱԳՆ մամուլի և տեղեկատվության վարչության պետ Տիգրան Մկրտչյանի հնչեցրած ուղիղ հարցը և այն, որ Ադրբեջանը ՀՀ և ԼՂՀ սահմաններում միտումնավոր սրում է իրավիճակը' բանակցություններն արգելակելու համար: Տիգրան Մկրտչյանն Ալիևին կոչ է արել դադարեցնել կրակոցները սահմաններին' նշելով, որ հակամարտության կարգավորումն սկսվում է, երբ դադարում են կրակոցները: «Չե՞ք կարծում, որ Ձեր գործողություններով դուք ավելի էք սրում իրավիճակը և այսպիսով Լեռնային Ղարաբաղի խաղաղ կարգավորումն ավելի դժվար իրականանալի դարձնում մոտ ապագայում: Իմ կոչը Ձեզ հետևյալն է՝ դադարեցրե՛ք կրակոցները»,- ասել է Տիգրան Մկրտչյանը:

Հարցից բորբոքված և շփոթված Ադրբեջանի առաջնորդը սկսել է կրկին անհիմն մեղադրանքներ հնչեցնել միջազգային հանրության, հայկական սփյուռքի և ՀՀ հասցեին և խուսափել է պատասխանել նաև այդ հարցին ու կոչին:

Մյունխենի համաժողովի արդյունքների հետ կապված ՀՀ ԱԳՆ խոսնակ Տիգրան Բալայանը Twitter-ի իր էջում մասնավորապես նշել է. «Մյունխենի անվտանգության կոնֆերանսում Ադրբեջանի նախագահը ներկայացրել է ինքնորոշման սկզբունքի մասին սեփական աղավաղված պատկերացումները»: Տիգրան Բալայանը շեշտել է, որ Ադրբեջանի նախագահը հրաժարվել է հավատարիմ մնալ ԼՂ համակարտության խաղաղ կարգավորման գործում ուժի կիրառումից կամ դրա կիրառման սպառնալիքից զերծ մնալու սկզբունքից: