Հայաստանում ատամնաբուժությունը զարգացման բարձր մակարդակ ունի. ՀՀ ԱՆ գլխավոր ստոմատոլոգ

Աշխարհում այսօր նշվում է Ստոմատոլոգների միջազգային օրը: Գրեթե 9 հազար տարվա պատմություն ունեցող այս մասնագիտությունն այսօր Հայաստանում բավականին բարձր մակարդակ ունի:

«Արմենպրես»-ի հաղորդմամբˋ փետրվարի 9-ին լրագրողների հետ զրույցում այս մասին ասաց ՀՀ ԱՆ գլխավոր ստոմատոլոգ Լազար Եսայանը: «Վերջին տարիներին Առողջապահության նախարարներն իրականացրել են որոշակի փոփոխություններ ստոմատոլոգիայի ոլորտում. կարգավորվել է հիվանդների սպասարկման փաստաթղթային շրջանառությունը, 2014 թվականի դեկտեմբերին հաստատվել է ստոմատոլոգիական ծառայությունների սպասարկման լիցենզավորման նոր կարգ, որը բավականին հաջողված էր և նպաստել է ծառայությունների որակի զարգացմանը: Անցած տարի հաստատվել է մասնագիտությունների և մասնագիտացումների ցանկը, որն աստիճանաբար հարմարեցվում է միջազգային չափանիշներին»,- նշեց Եսայանը:

Հայաստանը մեծ ներուժ ունի ատամնաբուժական տուրիզմի բնագավառում: Չնայած Հայաստանը որակյալ ատամնաբուժական ծառայություններ ունի և մրցունակ է աշխարհումˋ այն դեռ որևէ տեղ չի նշվում որպես տուրիստական վայր: Առողջապահության նախարարությունը համագործակցում է «Ստոմատոլոգիական տուրիզմ» հասարակական կազմակերպության, ինչպես նաև այլ երկրների առողջապահական տուրիզմի ոլորտի գործակալությունների հետ, հայաստանյան այդ բրենդը տարածելու և օտարերկյա զբոսաշրջիկներ ներգրավելու համար: Եսայանի գնահատմամբ, Հայաստանն օտարերկրացիներին հետաքրքիր է ոչ միայն ստոմատոլոգիական ծառայությունների մատչելիության, այլև մասնագետների բարձր պատրաստվածության առումով: «Իհարկե, լինում են դեպքեր, երբ հյուրը խնդիրներ է ունենում ճիշտ ընտրություն կատարելու և ուղղորդվելու հարցում: Արտասահմանյան երկրներից ստացել ենք ահազանգ այս հարցի վերաբերյալ»,- ասաց նա:

Անդրադառնալով ոլորտի խնդիրներին և անելիքներին' ԱՆ գլխավոր ատամնաբույժը նկատեց, որ դրանք վերաբերում են ինչպես ծառայությունների որակական հատկանիշներին, այնպես էլ սարքավորումների հագեցվածությանը: Թեև հայ մասնագետները հիմնականում առաջադիմական մոտեցում են ցուցաբերում և փորձում անմիջապես տիրապետել համաշխարհային նորություններին, հնարավորության սահմաններում դրանք կիրառելով Հայաստանում, այնուամենայնիվ, լինում են նաև դժգոհություններ և բողոքներ մասնագիտական պատրաստվածության վերաբերյալ: Նախարարության ուշադրության կենտրոնում են ստոմատոլոգիական կլինիկաների սանիտարահիգենիկ պայմանները: «Վերջին տարիներին լիցենզավորման համար բոլոր բուժհիմնարկներում հատուկ ուշադրություն են դարձնում սենյակների ախտահանման վիճակին: Քաջարանի դեպքը սթափեցնող էր բոլորի համար»,- ասաց Եսայանը:

Փետրվարի 9-ը որպես Ստոմատոլոգների միջազգային օր նշելու ավանդույթը կապվում է Ալեքսանդրիայի պաշտոնյաների մեկի դստեր' Ապոլոնիայի անվան հետ, ում 300 թվականի այս օրը Կաթոլիկ եկեղեցին դասել է տառապյալ սրբերի շարքը' հանուն հավատի կրած տառապանքների համար: