Արմեն Երիցյանը հանձնարարել է գազալցակայաններում ստուգումներն իրականացնել խստացված ռեժիմով

ՀՀ տարածքային կառավարման և արտակարգ իրավիճակների նախարարությունում հունիսի 1-ին տեղի է ունեցել հերթական ամենշաբաթյա խորհրդակցությունը, որը վարել է նախարար Արմեն Երիցյանը: Ինչպես տեղեկացնում են ՀՀ տարածքային կառավարման և արտակարգ իրավիճակների նախարարությունից, անդրադառնալով գազալցակայանների ստուգումներին ու վերահսկողությանը՝ նախարարը հանձնարարել է ՀՀ ՏԿԱԻՆ պետական հրդեհային և տեխնիկական անվտանգության տեսչության պետ Ա. Մկրտչյանին ստուգումներն իրականացնել խստացված ռեժիմով, խախտումների դեպքում դիմել համապատասխան միջոցների:

Փրկարար ծառայության տնօրեն, փ/ծ գեներալ-լեյտենանտ Սերգեյ Ազարյանը զեկուցել է անցյալ շաբաթվա ընթացքում գրանցված պատահարների, ձեռնարկած միջոցառումների, կատարված հանձնարարականների և ընթացիկ աշխատանքների մասին: Նախարարին զեկուցվել է մայիսի 26-27-ը ՄԱԿ-ի միջազգային որոնողափրկարարական խորհրդատվական խմբի (INSARAG) որակավորման գործընթացի շրջանակներում անցկացվող վերջին նախապատրաստական վարժանքի մասին, որն ամփոփելիս լեհ փորձագետները բարձր են գնահատել հայ փրկարարների պատրաստվածությունը:

Խորհրդակցությանը ՍՊԾ պետ Հ. Պետրոսյանը հայտնել է, որ Գառնու դիտարանում արդեն իրականացվում է շուրջօրյա սեյսմիկ հերթապահություն, շաբաթվա ընթացքում արդեն կսկսի գործել նաև լաբորատորիան, որտեղ կիրականացվի ստորգետնյա հանքայնացված ջրերի նմուշների քիմիական անալիզ:

ՀՀ ՏԿԱԻՆ «Մթնոլորտային երևույթների վրա ակտիվ ներգործության ծառայություն» ՊՈԱԿ-ի տնօրեն Ա. Կարապետյանը զեկուցել է շաբաթվա ընթացքում հակակարկտային կայանների աշխատանքների մասին: Հանրապետության բոլոր մարզերում նախորդ շաբաթ դիտվել են կարկտավտանգ ամպեր: Ընդհանուր առմամբ՝ հակակարկտային կայաններից իրականացվել է մոտ 180 000 կրակոց:

Միգրացիոն ծառայության պետ Գագիկ Եգանյանը ներկայացրել է շաբաթվա ընթացքում ՌԴ մուտքի արգելք ունեցող քաղաքացիների և ապաստանի հարցով դիմած քաղաքացիների մասին ամփոփ տվյալները և հայտնել, որ աշխատանքներ են տարվում ռուս գործընկերների հետ թղթակցության էլեկտրոնային տարբերակին անցնելու ուղղությամբ:

ՀՀ ՏԿԱԻՆ նախարարի գլխավոր խորհրդական Ս. Պետրոսյանի ջանքերով և գործընկերների աջակցությամբ մարզային ճգնաժամային կառավարման կենտրոնների համար ձեռք են բերվել ձայնագրող սարքեր՝ «911» ծառայության ահազանգերը վերահսկելու նպատակով: