Լավ կլիներ ունենալ այնպիսի հնարավորություն, որ հասարակությունն ընդհանրապես էլեկտրաէներգիայի վարձ չվճարեր. Գալուստ Սահակյան

Էլեկտրաէներգիայի սակագնի հնարավոր բարձրացման շուրջ խորհրդարանական լսումները նախատեսվում են հաջորդ շաբաթ: ՀՀ Ազգային ժողովի նախագահ Գալուստ Սահակյանը հույս ունի, որ Հանրային ծառայությունները կարգավորող հանձնաժողովը կկայացնի որոշում, որը կբավարարի հասարակությանը: «Լսումները հավանաբար տեղի կունենան հունիսի 12-ին: Բոլոր քաղաքական ուժերը զբաղվում են այս հարցով և դրա հանրագումարը կլինի խորհրդարանական լսումների անցկացումը, որը կտա բոլոր վիճելի հարցերի պատասխանները»,- «Արմենպրես»-ի փոխանցմամբ' լրագրողների հետ զրույցում ասաց Գալուստ Սահակյանը:

Ի պատասխան հարցի, թե ինչու պետք է հասարակ քաղաքացին վճարի «Հայաստանի էլեկտրական ցանցեր» ընկերության թանկարժեք գնումների համար, ԱԺ նախագահը հավաստիացրեց, որ ոչ մի բնակչի վճարումները չեն ուղղվել ճոխություններին:

Գալուստ Սահակյանը հույս հայտնեց, որ վերջնարդյունքում կկայացվի այնպիսի որոշում, որը համոզիչ կլինի հայ հասարակության համար: «Խնդիրը միայն գնի բարձրանալ-չբարձրանալը չէ, այլ այնպիսի որոշում լինի, որ ինչ-որ չափով հավանության արժանանա հասարակության կողմից: Լավ կլիներ ունենալ այնպիսի հնարավորություն, որ ամբողջ հասարակությունը' մեզանից սկսած, ընդհանրապես էլեկտրաէներգիայի վարձ չվճարեր, բայց մենք պետք է տեսնենք' ինչ պայմաններում ենք և ինչպիսի լուծումներ ունենք»,- ասաց Գալուստ Սահակյանը:

Ինչ վերաբերում է խորհրդարանական լսումների բաց կամ փակ լինելուն, ապա ԱԺ նախագահը նշեց, որ դա կորոշեն խմբակցությունների ղեկավարները: «Պատգամավորներն իրենք կորոշեն, ինձ համար բոլորովին միևնույնն է: Փոքր ծավալի քննարկումների միջոցով ավելի շատ խնդիրներ կարող են լուծվել, քան բացի դեպքում: Բաց քննարկման դեպքում բոլորը ներկայանում են այնպես, կարծես' պատրաստ են «կոտորվել» հանուն ազգի: Փակ քննարկումների ժամանակ փորձում են լուծումներ փնտրել»,- նշեց նա: