«Ֆորսաժ 7»-ը համաշխարհային կինոյի պատմության մեջ չորրորդ տեղն է զբաղեցրել դրամարկղային մուտքերով

Ավստրալացի ռեժիսոր Ջեյմս Վանի՝ ապրիլի 1-ին վարձույթ դուրս եկած «Ֆորսաժ 7»(Furious 7) ֆիլմը հաղթահարել է մեկուկես միլիարդ դոլար դրամարկղային մուտքերի նշագիծը: Ինչպես տեղեկացնում է «Արմենպրես»-ը՝ հղում անելով KPLA ռադիոընկերությանը, մինչև հունիսի 1-ը կինոնկարը համաշխարհային վարձույթում վաստակել է 1,506 միլիարդ դոլար:

«Այս ցուցանիշով կինոժապավենն զբաղեցրել է չորրորդ հորիզոնականը համաշխարհային կինեմատոգրաֆի պատմության մեջ ամենահասութաբեր ֆիլմերի վարկանիշում»,- ընդգծել է KPLA-ն:

Ըստ որում, մասնագետների կարծիքով՝ «Ֆորսաժ 7» կինոնկարը, որը շարունակում է ցուցադրվել մի շարք երկրների կինոթատրոններում, բոլոր հնարավորություններն ունի վարկանիշում դուրս գալու երրորդ հորիզոնական՝ հետ մղելով «Վրիժառուները» (The Avengers, 2012) ֆիլմը: Վերջինիս դրամարկղային մուտքերը կազմել են 1,518 միլիարդ դոլար:

Երկրորդ հորիզոնականը (2,186 միլիարդ դոլար) զբաղեցնում է ռեժիսոր Ջեյմս Քեմերոնի «Տիտանիկը»(Titanic, 1997), իսկ առաջինը՝ նրա իսկ «Ավատարը» (2,787 միլիարդ դոար), որը նկարահանվել է 2009 թվականին:

Ինչպես նշում է ՏԱՍՍ-ը, «Ֆորսաժ 7» կինոժապավենը դարձել է «Յունիվերսալ» (Universal) կինոընկերության՝ ֆինանսական առումով ամենահաջողված նախագիծը: Այժմ կինոընկերությունն շտապում է հնարավորինս արագ սկսելու «Ֆորսաժ» կինոպատումի հերթական և թվով ութերորդ ֆիլմի նկարահանումը:

Կինոընկերության ղեկավարությունն արդեն հայտարարել է, որ «Ֆորսաժ 8»-ը վարձույթ դուրս կգա 2017 թվականի ապրիլի 14-ին: Առայժմ հայտնի չէ, թե ով է նկարահանելու կինոնկարը: