ԱՄՆ ներկայացուցիչների պալատը կքննարկի Հայաստանին և Արցախին հատկացվելիք օգնությունը

ԱՄՆ Ներկայացուցիչների պալատի Հատկացումների ենթահանձնաժողովն այս շաբաթ պատրաստվում է քննարկման դնել 2016 թվականի ֆինանսական տարում Հայաստանին և Լեռնային Ղարաբաղին հատկացվելիք արտաքին օգնությունը:

Ինչպես տեղեկացնում են Հայ դատի ԱՄՆ հանձնախմբից, քվեարկությունը կկայանա հունիսի 3-ին: Փաստաթղթի տեքստը հասանելի կլինի միայն ենթահանձնաժողովի քննարկումից հետո:

Հայ դատի հանձնաժողովը Միացյալ Նահանգներում բնակվող հայերին կոչ է անում կապ հաստատել իրենց օրենսդիրների հետ և հորդորել առնվազն 5 մլն դոլար հատկացնել Լեռնային Ղարաբաղի զարգացման համար, 40 մլն դոլարի տնտեսական աջակցություն ցուցաբերել Հայաստանին: Պահանջվում է նաև որպեսզի Վրաստանին հատկացվելիք աջակցության 10 տոկոսը ուղղվի Սամցխե-Ջավախք շրջանում աշխատատեղերի ստեղծման ծրագրերին, հատուկ ուշադրության կենտրոնում պահել Սիրիայի հայերի, ասորիների և վտանգի տակ գտնվող մյուս փոքրամասնությունների խնդիրները, ինչպես նաև թիրախավորված աջակցություն ցուցաբերել Հայաստանին՝ հազարավոր սիրիացի գաղթականներին ապաստանելու համար:

Հայ դատի հանձնախումբը Հատկացումների ենթահանձնաժողովի անդամներից նաև պահանջելու է որևէ ռազմական օգնություն չցուցաբերել Ադրբեջանին, քանի դեռ այն չի համաձայնել դիպուկահարներին հանելու ԵԱՀԿ Մինսկի խմբի հորդորներին, չի դադարեցրել ագրեսիան և լիովին հանձն չի առնել ԼՂ հակամարտության խաղաղ կարգավորումը:

Փետրվարին ԱՄՆ նախագահ Օբամայի վարչակազմը հրապարակել էր 2016 ֆինանսական տարվա ԱՄՆ արտաքին օգնության բյուջեի տարբերակը, որով պետք է կրճատվեր անում կրճատել ԱՄՆ տնտեսական աջակցությունը Հայաստանին և Ադրբեջանինˋ պահպանելով այս երկու երկրներին հատկացվելիք ռազմական օգնության հավասարակշռությունը:

Նախագահն առաջարկել էր 2016-ին 18 մլն 360 հազար դոլարի տնտեսական աջակցություն տրամադրել Հայաստանին, որը եթե ընդունվի Կոնգրեսի կողմից, ՀՀ անկախությունից հետո ամենացածր օգնությունը կլինի ԱՄՆ կողմից: