Հայաստանի բանտերում կբարելավվի առողջապահական համակարգը

Մեկնարկեց Հայաստանի բանտերում առողջապահության և մարդու իրավունքների պաշտպանության ամրապնդմանն ուղղված ծրագիրը:

Այս մասին «Արմենպրես»-ի հաղորդմամբ, հունիսի 2-ին ծրագրի մեկնարկին նվիրված միջոցառմանը լրագրողներին տեղեկացրեց ՀՀ արդարադատության նախարար Հովհաննես Մանուկյանը:

«Առողջության իրավունքը մարդու ֆունդամենտալ իրավունքն է, և անկախ մարդն ազատության կամ անազատության մեջ լինելուց, անձը պետք է հնարավորություն ունենա իրականացնել իր իրավունքը, իսկ քրեակատարողական հիմնարկներում բուժական ծառայությունները պետք է պատշաճ որակ ունենան: Այս իսկ պատճառով անցած տարի մենք իրականացրել ենք մի շարք ծրագրեր, որոնք նպաստելու են առողջապահական ոլորտի բարելավմանը, սակայն եվրոպական գործընկերների հետ մեկնարկող ծրագիրը էականորեն պետք է բարելավի իրավիճակը», - ասաց Հովհաննես Մանուկյանը:

Նախարարի խոսքով՝ ծրագիրը բաղկացած է մի քանի բաղադրիչներից, որոնք վերաբերում են քրեակատարողական հիմնարկներում իրավիճակի գնահատմանը, բուժական ոլորտի տեխնիկական հագեցվածությանը, ծառայող բժիշկների համապատասխան մասնագիտական վերապատրաստմանը:

Ծրագրի նպատակն է ամրապնդել մարդու իրավունքները՝ բարելավելով բուժծառայության, այդ թվում հոգեկան առողջության, հետ կապված խնամքի տրամադրումը Հայաստանի բանտերում: Ծրագիրը, մասնավորապես, նպատակ է հետապնդում բարելավել Հայաստանի քրեակատարողական հիմնարկներում առողջապահության իրավական և ինստիտուցիոնալ ոլորտը, բարելավել քրեակատարողական հիմնարկների բուժմասերի նյութական պայմանները:

«Այն, ինչ ծրագրվում է իրականացնել այս նախագծի շրջանակում, կարող է բերել քրեակատարողական հիմնարկների որակի մեծ փոփոխություն, քանի որ այս հաստատություններում հիմնական խնդիրներն են բժիշկների և բժշկական սարքավորումների, շենքային պայմանների խնդիրները», - ասաց Արդարադատության նախարարության քրեակատարողական հիմնարկներում հասարակական վերահսկողություն իրականացնող հասարակական դիտորդական խմբի նախագահ Ռուբեն Սարգսյանը:

Իրավապաշտպանը հույս հայտնեց, որ այս ծրագրի շնորհիվ քրեակատարողական հիմնարկներում քառասուն տարվա վաղեմության կարդիոգրաֆը կփոխարինվի ժամանակակից սարքով:

«Առողջապահության և մարդու իրավունքների պաշտպանության ամրապնդումը Հայաստանի բանտերում» ծրագրի համար հատկացված 900 հազար եվրոյի ֆինանսավորումը տրամադրել է Եվրամիությունը Արևելյան գործընկերության երկրներում 2015-2017 թթ. ծրագրային համագործակցության շրջանակում և նախատեսվում է այն ավարտին հասցնել 2017 թ. փետրվարի 28-ին: