Փոխնախարարը խնդիրներ է տեսնում գազալցակայանների տեխնիկական կանոնակարգման ոլորտում

Գազալցակայանների և շարժական ավտոմեքենաների վերաբերյալ Եվրասիական տնտեսական միության տեխնիկական կանոնակարգերը խստացված են, որոնք գործելու դեպքում Հայաստանում այդ ոլորտում առկա խնդիրները կկարգավորվեն: Այս մասին Ազգային ժողովում ՀՀ 2014թ. պետական բյուջեի կատարման հաշվետվության քննարկման ժամանակ ասաց ՀՀ էկոնոմիկայի նախարարի տեղակալ Էմիլ Տարասյանը:

«Եվրասիական տնտեսական միության նորմերը բավականին խիստ են այս առումով: Այդ նորմերը, որոնք կգործեն 2016 թ. հունվարից, վերաբերում են ԱԳԼՃԿ-ների և անվավոր շարժական ավտոմեքենաների նկատմամբ նոր տեխնիկական կանոնակարգերին: Արդյունքում մեր կողմից խստացված անվտանգության նորմեր կստեղծվեն, և, պատշաճ անվտանգություն իրականացնելու դեպքում, մենք զերծ կմնանք ոչ ցանկալի դեպքերից»,- «Արմենպրես»-ի հաղորդմամբ, ընդգծեց Տարասյանը՝ պատասխանելով ԲՀԿ խմբակցության ղեկավար Նաիրա Զոհրաբյանի՝ Հայաստանում գազալցակայանների անվտանգության վերաբերյալ հարցին:

Փոխնախարարը հստակեցրեց, որ նախարարությունը համակարգում է գազալցակայանների տեխնիկական կանոնակարգման ոլորտը, իսկ դրա վերահսկողությունն իրականացնում է ՀՀ ՏԿԱԻՆԸ: «Ոլորտում բավական խնդիրներ ունենք, որը քննարկել ենք նաև տրանսպորտի նախարարության հետ։ Խոսքը վերաբերում է կտրոններին, որպեսզի դրանք փակցվեն տեսանելի տեղում, հստակեցման կարիք ունի ավտոմեքենաների տեխսպասարկման ժամանակ գազաբալոնների անվտանգության հավաստիացման գործընթացը: Հստակեցման կարիք ունեն նաև գազաբալոնների լաբորատոր փորձարկման նկատմամբ իրականցվող պահանջների խստացումները: Այս ամբողջ ոլորտը պետք է համակարգային նայել»,- ասաց նա: