Այվազովսկու «Երեկոն Կահիրեում» կտավը հանվել է Sotheby's-ի աճուրդից

Հովհաննես Այվազովսկու «Երեկոն Կահիրեում» կտավը վաճառողի խնդրանքով հանվել է Մեծ Բրիտանիայում անցկացվող աճուրդից: Այդ մասին, ինչպես տեղեկացնում է «Արմենպրես»-ը, ՌԻԱ Նովոստիին հայտնել է Sotheby's աճուրդների տան՝ վաճառքների հետ կապված համաշխարհային հաղորդակցումների բաժնի ղեկավար Մեթյու Վեյմանը:

«Հովհաննես Այվազովսկու «Երեկոն Կահիրեում» կտավը՝ թիվ 23 լոտը, Sotheby's-ի՝ ռուսական կերպարվեստի ստեղծագործությունների վաճառքից հանվել է սեփականատիրոջ խնդրանքով»,-ասել է նա:

Ավելի վաղ ՌԴ ՆԳ նախարարության ներկայացուցիչ Ելենա Ալեքսեևան հայտնել էր, որ ռուսական Ինտերպոլը պահանջել է Մեծ Բրիտանիայի իրավապահ մարմիններից Հովհաննես Այվազովսկու հափշտակված նկարը հանել աճուրդից: Ալեքսեևայի խոսքով՝ «Երեկոն Կահիրեում» կտավը 1997 թվականին հափշտակվել է մասնավոր հավաքածուից:

«Երեկոն Կահիրեում» կտավը խոստանում էր դառնալ աճուրդի ամենաթանկարժեք գործերից մեկը: Դրա նախնական արժեքը գնահատվում է 1,5-2 մլն ֆունտ ստեռլինգ: Այն չէր ցուցադրվում 1950 թվականից՝ այն ժամանակվանից, երբ ցուցադրվեց Տրետյակովյան պատկերասրահում:

1940-ական թվականներին այդ գործը, ըստ ԶԼՄ-ների տվյալների, պատկանել է Իվան Նոսենկոյի՝ ԽՍՀՄ-ի տրանսպորտային մեքենաշինության նախարարի, իսկ այնուհետև ԽՍՀՄ-ի նավաշինական արդյունաբերության ժողովրդական կոմիսարի ընտանիքին: