Երևանում և Բելգրադում կբացվեն դիվանագիտական ներկայացուցչություններ

Հայաստանը և Սերբիան ակտիվացնում են բարձր մակարդակի քաղաքական երկխոսությունը: Արդեն աշխատանքներ են տարվում Երևանում և Բելգրադում դիվանագիտական ներկայացուցչությունների հիմնադրման ուղղությամբ: «Արմենպրես»-ի փոխանցմամբ՝ հունիսի 3-ին Հայաստան ժամանած ԵԱՀԿ գո րծող նախագահ և Սերբիայի արտաքին գործերի նախարար Իվիցա Դաչիչի հետ համատեղ ասուլիսի ժամանակ ասաց ՀՀ արտաքին գործերի նախարար Էդվարդ Նալբանդյանը:

«Հայաստանը և Սերբիան, հայերն ու սերբերը եղբայրական երկրներ և ժողովուրդներ են: Պատմության ընթացքում բազմաթիվ են դրվագները, երբ հայը և սերբը, փոխադարձ համերաշխության դրսևորմամբ, ծանր պահերի միմյանց ձեռք են մեկնել: Մեն երկուստեք կարևորում ենք Հայաստանը և Սերբիան կապող դարավոր բարեկամությունը»,- ասաց Նալբանդյանը՝ հատկապես կարևորելով Սերբիայի նախագահ Տոմիսլավ Նիկոլիչի մասնակցությունը ապրիլի 24-ին Ծիծեռնակաբերդի հուշահամալիրում Հայոց ցեղասպանության 100-րդ տարելիցի հիշատակի արարողությանը:

ՀՀ արտաքին գերատեսչության ղեկավարի խոսքովˋհանդիպման ընթաքում ստորագրվել է երկու երկրների արտգործանախարարությունների միջև փոխգործակցության մասին հուշագիր, որով նախատեսվում է պարբերական քաղաքական խորհրդակցությունների անցկացում:

Հանդիպմանը քննարկվել են երկկողմ համագործակցության զարգացման և ընդլայնման նպատակով ձեռնարկվելիք քայլերը, տնտեսական, մշակութային և միջխորհրդարանական կապերի ամրապնդման հետ կապված հարցեր:

Սերբիայի արտաքին գործերի նախարար Իվիցա Դաչիչը Հայաստան է ժամանել հունիսի 3-ին: Սա նրա առաջին այցն է Երևան:

Նախքան Հայաստան այցելելը Դաչիչը մայիսի 31-ին այցելել է Ադրբեջան, ապա Վրաստան: